اسلم گل نے کہا ہے کہ آصف علی زرداری اور بلاول بھٹو کی کال پر لاہور کی عوام جلسے کے لیے ضرور باہر نکلے گی۔

پیپلز پارٹی لاہور کے صدر اسلم گل نے پریس کانفرنس کرتے ہوئے کہا کہ آج پیپلز پارٹی لاہور کا اجلاس تھا اور لاہور کی ساری قیادت اجلاس میں موجود تھی۔

ان کا کہنا تھا کہ ستائیس فروری کو لانگ مارچ کراچی سے شروع ہو گا اور ناصر باغ میں سندھ سے آنے والے لانگ مارچ کا ویلکم کیا جائے گا۔

انہوں نے کہا کہ چیئرمین کا اہلیان لاہور بھرپور استقبال کرے گی۔

اسلم گل کا کہنا تھا کہ اگر پیپلز پارٹی باہر نہ نکلی تو عوام ہمیں معاف نہیں کرے گی کیونکہ اس حکومت نے عوام سے روٹی کا نوالا تک چھین لیا، بچوں کی فیسوں اور ادویات سمیت ہر چیز عوام کی دسترس سے باہر ہو گئی، عوام کے اوپر حکومت کے مافیاز نافض ہو گئے ہیں۔

ان کا کہنا تھا کہ ایسا وزیراعظم جسے کوئی سوج بوجھ نہ ہو اُسے کیا پتہ حکومت کیسے چلائی جاتی ہے، بھٹو نے تہتر کا آئین دیا جس سے جمہوریت کو فروغ ملا، ایک مرتبہ پھر چیئرمین کی قیادت میں جمہورت کو فروغ دینا ہے۔

انہوں نے کہا کہ اب روزانہ کی بنیاد پر ہر ڈسٹرکٹ میں کارنر میٹنگ ہو گی، ہر روز نیشنل اسمبلی جا کر لانگ مارچ کے جلسے  کو اجاگر کریں گے۔

اسلم گل نے مزید کہا کہ صدر آصف علی زرداری اور بلاول بھٹو کی کال پر لاہور کی ساری عوام باہر نکلے گی، انشاللہ لاہور کی عوام پر یقین ہے کہ وہ لانگ مارچ کو کامیاب بنائیں گے۔