صدر مملکت نے کہا ہے کہ جدید ٹیکنالوجی کے استعمال سے کرپشن میں کمی لائی جاسکتی ہے۔

صدر مملکت ڈاکٹر عارف علوی نے ٹیکس گزاروں کی آگاہی کیلئے سیمینار سے خطاب کرتے ہوئے کہا کہ ٹیکس گزاروں کی سہولت ، مسائل کے حل کیلئے وفاقی محتسب کا ادارہ  بہترین کردار ادا کررہا ہے۔

انہوں نے کہا کہ وفاقی ٹیکس محتسب نے شکایت کنندگان کو گزشتہ سال 8.5 ارب روپے کی ریلیف فراہم کی ، وفاقی محتسب کا ادارہ کاروباری برادری کیلئے کاروبار میں آسانی  پیدا کرنے میں اہم کردار ادا کررہا ہے۔

صدر مملکت کا کہنا تھا کہ سرکاری امور کی انجام دہی میں غیر ضروری تاخیر  سے ٹیکس گزاروں کو مشکلات کا سامنا کرنا پڑتا ہے، عوام ٹیکس حکام کی ناانصافی و بدانتظامی کے خلاف انصاف کیلئے ٹیکس محتسب سے رجوع کریں۔

ڈاکٹر عارف علوی نے کہا کہ جدید ٹیکنالوجی کے استعمال سے کرپشن میں کمی لائی جاسکتی ہے، بلاک چین ٹیکنالوجی کی مدد سے فنڈز کی چوری ، کرپشن اور رشوت ستانی کو کم کیا جاسکتا ہے۔

صدر مملکت نے یہ بھی کہا کہ جدید آئی ٹی لوازمات کی مدد کی سے ٹیکس گزاروں کو جلد ریلیف فراہم کرنے کی ضرورت ہے جبکہ مسائل کے بروقت حل کیلئے حکومتی اداروں اور عوام کے درمیان  بہتر روابط کی بھی ضرورت ہے۔

عارف علوی کا کہنا تھا کہ وفاقی ٹیکس محتسب کی خدمات اور کارکردگی کے بارے میں لوگوں کو آگاہی دینے کی ضرورت ہے۔ ٹیکس اداروں ، وفاقی محتسب کے درمیان خوشگوار تعلقات  ٹیکس گزاروں کیلئے سودمند ثابت ہوں گے۔

صدر مملکت ڈاکٹر عارف علوی کا مزید کہنا تھا کہ ٹیکس گزاروں کو انصاف کی فراہمی کیلئے ٹیکس محتسب کا دائرہ کار کو ملک بھر میں توسیع دینا ہوگی۔

آگاہی سیمینار سے وفاقی ٹیکس محتسب ڈاکٹر آصف محمود جاہ نے بھی خطاب کیا اور کہا کہ ٹیکس محتسب ٹیکس حکام کی ناانصافی ، بد انتظامیوں کے خلاف عوام کو ریلیف فراہم کر رہا ہے۔

ڈاکٹر آصف محمود جاہ کا مزید کہنا تھا کہ عوام کو جلد انصاف کی فراہمی کیلئے جدید ٹیکنالوجی کو بروئے کار لایا جارہا ہے، گزشتہ 5 سالوں میں ٹیکس محتسب نے 27 ارب روپے ریفنڈ کرائے۔

واضح رہے کہ ٹیکس گزاروں کی آگاہی کیلئے سیمینار میں صدر مملکت ڈاکٹر عارف علوی نے وفاقی ٹیکس محتسب ویب پورٹل کا بھی افتتاح کیا۔