حکومت سندھ نے صحافیوں کے تحفظ اور ناگہانی موت کی صورت میں ان کے اہل خانہ کی کفالت کے لئے ٹھوس اقدامات کرنے کا فیصلہ کیا ہے۔

کراچی کی صحافی تنظیموں کے نمائندوں پر مشتمل جرنلسٹس جوائنٹ ایکشن کمیٹی کے کنونئیر و سیکریٹری کراچی پریس کلب رضوان بھٹی کی قیادت میں وفد سے  وزیراطلاعات سندھ سعید غنی کی ملاقات ہوئی۔

ملاقات میں وزیراطلاعات سندھ سعید غنی نے کہا کہ سندھ حکومت نے صحافیوں کے تحفظ، ناگہانی موت کی صورت میں انکے اہل خانہ کی کفالت کے لئے ٹھوس اقدامات کرنے کا فیصلہ کیا ہے۔

سعید غنی نے کہا کہ ناگہانی موت کی صورت میں اہل خانہ کو تحفظ اور کفالت  کا معاملہ حال ہی میں منظور کئے جانے والے جرنلسٹس پروٹیکشن بل میں ترمیم  کر کے شامل کر لیا، جرنلسٹس جوائنٹ ایکشن کمیٹی کے کنوینر  رضوان بھٹی نے مستقبل میں صحافیوں اور ان کے اہل خانہ کو تحفظ فراہم کرنے کے حوالے سے تین تجاویز پیش کردیں۔

وزیراطلاعات سندھ کا کہنا تھا کہ جرنلسٹس پروٹیکشن بل کے تحت  کمیشن کا قیام عمل میں آنے تک صحافیوں، امن و امان کی بحالی کے اداروں کے اعلٰی افسران اور حکومتی نمائندوں پر مشتمل ایک ایڈہاک کمیٹی تشکیل دی جائے گی۔

انہوں نے کہا کہ تجویز میں آئندہ ایسے واقعات کی روک تھام کے لیے صحافیوں کے نمائندوں، قانون نافذ کرنے والے اداروں اور حکومتی نمائندوں پر مشتمل کمیٹی کے قیام کے ساتھ  صحافی کی ناگہانی موت کی صورت میں اہل خانہ کی کفالت کا معاملہ شامل ہے۔

وزیراطلاعات سندھ نے  بھی کہا کہ جرنلسٹس جوائنٹ ایکشن کمیٹی کے مطالبات اور تجاویز سے اتفاق کیا ہے، صحافیوں کی پیش کردہ تجاویز پر  عملی اقدامات کے لئے سندھ حکومت تیار ہے۔

سعید غنی کا کہنا تھا کہ ناگہانی موت کی صورت میں اہل خانہ کو تحفظ اور کفالت  کا معاملہ حال ہی میں منظور کئے جانے والے جرنلسٹس پروٹیکشن بل میں ترمیم  کرکے شامل کر لیا جائے گا، بل پاس ہونے تک ایڈہاک کمیٹی تشکیل دینے پر جرنلسٹس جوائنٹ ایکشن کمیٹی نے اس تجویز کو سراہا ہے۔

 ان کا یہ بھی کہنا تھا کہ ایڈہاک کمیٹی میں کراچی پریس کلب کے صدر، سیکریٹری، کراچی یونین آف جرنلسٹس کے تینوں تنظیموں کا ایک ایک نمائندہ شامل ہو گا، یہی کمیٹی تمام ٹی او آز بنا کر دے گی۔

 سعید غنی نے کہا کہ ٹی او آر کو سندھ کابینہ کی منظوری سے جرنلسٹس پروٹیکشن بل میں شامل کر لیا جائے گا، حکومت سندھ اسی ایڈہاک کمیٹی میں قانون نافذ کرنے والے اداروں کے نمائندوں کو شامل کر کے ایک ہائی پروفائل کمیٹی بنائے گی تاکہ آئندہ ایسے واقعات کی روک تھام ہو سکے۔

   وزیراطلاعات سندھ سعید غنی نے مزید کہا کہ اطہر متین جیسا کوئی واقعہ دوبارہ رونما ہونے کی صورت میں فوری اقدامات کیے جائیں گے، سندھ پولیس اطہر متین احمد کے قاتلوں کی گرفتاری کے لئے ہر ممکن اقدامات کر رہی ہے امید ہے کہ جلد ہی قاتل پکڑے جائیں گے۔

وفد میں کراچی پریس کلب کے صدر فاضل جمیلی، اطہر متین کے بھائی اینکر طارق متین، پی ایف یو جے رہنما جاوید چوہدری ، کراچی یونین آف جرنلسٹس برنا کے جنرل سیکرٹری عاجز جمالی، کراچی یونین آف جرنلسٹس دستور کے صدر راشد عزیز ، جنرل سیکریٹری موسی کلیم ، پاکستان ایسوسی ایشن آف پریس فوٹوگرافرز کے صدر محمد جمیل ، کرائم رپورٹرز ایسوسی ایشن کے صدر راؤ عمران اور کراچی یونین آف جرنلسٹس کے جوائنٹ سیکریٹری طلحہ ہاشمی نے بھی ملاقات میں شرکت کی۔