وزیر خارجہ نے کہا ہے کہ پاکستان باہمی مفاد کے تمام شعبوں میں ہنگری کے ساتھ تعاون میں اضافے کا خواہاں ہے۔

ترجمان دفترخارجہ عاصم افتخار احمد کی جانب سے جاری کردہ بیان کے مطابق وزیر خارجہ شاہ محمود قریشی کا ہنگری کے وزیر خارجہ پیٹر سیاآرتو سے ٹیلی فونک رابطہ ہوا جس میں وزیرخارجہ شاہ محمود نے ہنگری کے وزیر خارجہ سے انخلاء میں سہولت کاری سے متعلق گفتگو کی۔

ٹیلیفونک رابطے کے دوران دونوں فریقین نے پاکستان اور ہنگری کے تعلقات پر تبادلہ خیال کیا جبکہ دونوں وزرا خارجہ نے علاقائی صورتحال پر گفتو کی اور دونوں وزرا خارجہ نے قریبی رابطہ استوار رکھنے پر اتفاق بھی کیا۔

اس موقع پر وزیر خارجہ شاہ محمود قریشی نے یوکراین کی صورتحال پر گہری تشویش کا اظہار کرتے ہوئے بات چیت اور سفارت کاری کے ذریعے تنازعات کے پرامن حل سے متعلق پاکستان کے نکتہ نظر کو اجاگر کیا۔

شاہ محمود قریشی نے کہا کہ پاکستان باہمی مفاد کے تمام شعبوں میں ہنگری کے ساتھ تعاون میں اضافے کا خواہاں ہے۔ پاکستان کا اصولی موقف کثیرالقومی متعلقہ معاہدات، عالمی قانون اور اقوام متحدہ کے منشور کے اصولوں کے مطابق حل کی اہمیت پر مبنی ہے۔

وزیر خارجہ شاہ محمود قریشی نے پاکستانی طالب علموں اور شہریوں کے یوکرین سے انخلاءمیں ہنگری کی حکومت کی طرف سے فراہم کی جانے والی معاونت پر اظہار تشکر کیا اور کہا کہ یوکرین میں موجود پاکستانیوں اور طالب علموں کے خوش اسلوبی اور تیزی سے سرحد عبور کرنے اورام اس ضمن میں سہولت کاری جاری رکھنے کے منتظر ہیں۔

ہنگری کے وزیر خارجہ پیٹر سیاآرتو نے انخلاءکے عمل میں ہنگری کی جانب سے مکمل مدد اور تعاون کا یقین دلایا۔