پاکستان مسلم لیگ (ن) کے صدر شہباز شریف کا کہنا ہے کہ نوازشریف کی قیادت میں قیام پاکستان کے مقاصد کو تعبیر دےکر رہیں گے۔

قائد حزب اختلاف شہباز شریف نے قیام پاکستان کی پچھترویں سالگرہ پر قوم کو مبارک دی اور ملک وقوم کے لئے دعا بھی کی۔

شہبازشریف نے کہا کہ پاکستان اللہ تعالیٰ کی رحمت اور مسلمانان برصغیر کی دعاﺅں کی قبولیت کا مظہر ہے، بابائے قوم حضرت قائداعظم کی ولولہ انگیز قیادت میں جہوری جدوجہد سے پاکستان وجود میں آیا۔

ن لیگ کے صدر نے کہا کہ وطن کے قیام کے لئے قربان ہوجانے اور عظیم قربانیاں دینے والوں کو سرجھکا کر سلام پیش کرتے ہیں۔

انہوں نے کہا کہ آج کے دن ہم تحریک پاکستان کے شہداء اور غازیوں کو شاندار الفاظ میں خراج عقیدت پیش کرتے ہیں۔

شہبازشریف نے کہا کہ پاکستان مسلمانان برصغیر کی آرزوﺅں کا مرکز اور ایک مقدس امانت ہے، پچھتر برس میں پاکستان جوہری ملک بنا اور تعمیر وترقی کا شاندار سفر طے کیا۔

قائد حزب اختلاف کا کہنا ہے کہ کرچی کرچی جمع کرکے جو آشیانہ بسایا گیا تھا، وہ آج 22 کروڑ زندہ وتابندہ اور قابل فخرپرعزم پاکستانیوں کا سربلند وطن ہے۔

شہبازشریف نے کہا کہ بحیثیت قوم ہمیں بابائے قوم کے ایمان، اتحاد اور تنظیم کے فرمان پرعمل پیرا ہونے کی ضرورت ہے، مسلمانان برصغیر کے خوابوں کی تعبیر کے لئے پاکستان کو معاشی قوت بنانا بنیادی تقاضا ہے۔

انکا کہنا ہے کہ پاکستان کی آزادی اور شہداء کی قربانیاں متقاضی ہیں کہ ہم جمہوری، معاشی اور خارجہ محاذ پر اپنا حقیقی لوہا منوائیں، اس مقصد کے حصول کے لئے عوام کی نمائندہ تمام سیاسی جماعتوں اور فریقین کو مل کر ایک قومی ایجنڈے پر اتفاق کرنا ہوگا، مفاہمت سے مل کر کام کرنا ہو گا۔

انہوں نے مزید کہا کہ پاکستان کی آزادی، سالمیت اور خودمختاری کو ناقابل تسخیر بنانے کے لئے معاشی قوت، سیاسی استحکام، انصاف اور عوام کی سماجی فلاح لازمی تقاضے ہیں، ہم عہد کرتے ہیں کہ محمد نوازشریف کی قیادت میں قیام پاکستان کے مقاصد کو تعبیر دے کر رہیں گے۔