مونس الٰہی نے کہا ہے کہ رمضان المبارک میں کھانے پینے کی اشیاء کی قیمتوں میں کمی کی جائے۔

وفاقی وزیر برائے آبی وسائل مونس الٰہی کی زیر صدارت داسو ہائیڈرو پاور پراجیکٹ کی اسٹیئرنگ کمیٹی کا 18واں اجلاس ہوا جس میں چیئرمین واپڈا نے اجلاس میں بریفنگ دیتے ہوئے کہا کہ واپڈا پراجیکٹ ایریا میں مقامی کمیونٹی کے فائدے کیلئے متعدد سکیمیں چلا رہا ہے جس میں جال کوٹ پل کی تعمیر، فری میڈیکل کیمپس، سہولیات کی فراہمی، مقامی بچوں کیلئے اسکول بس، سولر اسکیم، مساجد کی تعمیر اور ہیلتھ یونٹس وغیرہ شامل ہیں۔

ایڈیشنل سیکرٹری توانائی کے پی نے پیڈو کی طرف سے رپورٹ دو ہفتے کے اندر واپڈا کو جمع کرانے کی یقین دہانی کرائی۔

مونس الٰہی کا اس موقعے پر کہنا تھا کہ کے پی ضلعی انتظامیہ، اپر کوہستان 30 جون 2022 تک 1000 متاثرین کو ادائیگیوں کے حوالے سے نازک معاملات کو مکمل کرے گی، ادائیگی کے بعد زمین کا قبضہ فوری طور پر واپڈا کے حوالے کر دیا جائے گا۔

ان کا کہنا تھا کہ کمشنر ہزارہ ماہ رمضان سے قبل پتن اور کوہستان لوئر کے مقامی لوگوں کے ساتھ جرگہ کریں تاکہ 132 کے وی ٹرانسمیشن لائن پر تعمیر کا کام بغیر کسی تاخیر کے شروع کیا جا سکے۔

انہوں نے کہا کہ مانسہرہ اور دیگر ترقی یافتہ علاقوں سے کوہستان تک خوردنی اشیاء کی نقل و حمل میں ضلعی انتظامیہ کی مدد کے امکانات کو تلاش کیا جائے، رمضان المبارک میں کھانے پینے کی اشیاء کی قیمتوں میں کمی کی جائے۔

مونس الٰہی کا کہنا تھا کہ پیڈو (PEDO) پتن کے مقامی لوگوں کو بجلی کی ضرورت کا پتہ لگانے کے لیے دو ہفتوں کے اندر اپنی رپورٹ پیش کرے تاکہ زیریں کوہستان کے علاقے میں اعتماد سازی کے اقدام کے طور پر ضروری اقدامات کیے جا سکیں۔

ان کا کہنا تھا کہ اس سے داسو ہائیڈرو پاور پراجیکٹ کی تعمیر کیلئے بجلی کی فراہمی کیلئے پتن سے داسو تک 132 کے وی ٹرانسمیشن لائن کی تعمیر کی راہ ہموار ہو گی۔

اجلاس میں تین ایجنڈا آئٹمز پر تبادلہ خیال ہوا۔

اجلاس میں اینہانسڈ سیلف مینیجڈ ری لوکیشن (ESMR) پیکیج کے تحت متاثرین کو ادائیگی کے طریقہ کار پر کے پی حکومت کی تجویز کی منظوری دی گئی، پتن سے داسو تک 132 کے وی ٹرانسمیشن لائن کی تعمیر کیلئے دائیں راستے کے مسئلے کے حل کی پیشرفت کا جائزہ لیا گیا اور ڈی سی اپر کوہستان نے ESMR پیکیج کے تحت متاثرین کو ادائیگیوں کے طریقہ کار پر مشتمل تجویز دی۔

اجلاس میں سیکرٹری وزارت آبی وسائل، چیئرمین واپڈا، ایڈیشنل سیکرٹری پاور ڈویژن، سینئر جوائنٹ سیکرٹری اکنامک افیئر ڈویژن، ممبر (واٹر) واپڈا، چیف انرجی، پلاننگ کمیشن، ممبر بورڈ آف ریونیو، حکومت خیبرپختونخوا، کمشنر ہزارہ ڈویژن، ڈی سی کوہستان اپر، ایڈیشنل سیکرٹری محکمہ توانائی کے پی اور وفاقی اور صوبائی حکومت کے پی کے کے دیگر افسران کے ساتھ ساتھ ورلڈ بینک کے نمائندوں نے بھی شرکت کی۔