وزیراعظم کے معاون خصوصی برائے صحت ڈاکٹر فیصل نے کہا ہے کہ کورونا وباء واضح طور پر نیچے کی طرف جارہی ہے اور اس کا زور ٹوٹتا ہوا نظر آرہا ہے۔

پریس کانفرنس کرتے ہوئے ڈاکٹر فیصل سلطان نے کہا ہے کہ کورونا وباء کا دباؤ ضرور ختم ہوا ہے لیکن اس کی آنکھ مچولی دنیا بھر میں جاری ہے جس کے لئے احتیاطی تدابیر جاری رکھنے کی ضرورت ہے۔

 ان کا کہنا تھا کہ اس وباء کے بچاؤ کے لئے ضروری ہے کہ تمام شہری ویکسییشن کا عمل جاری رکھیں اور اس عمل کو جلد از جلد مکمل کریں۔

انہوں نے بتایا کہ مستقبل میں اگر اس وباء کا دباؤ بڑھا تو ضرور پابندیوں کی طرف جاسکتے ہیں لیکن یہ سب دنیا بھر میں ہونے والے اثرات کو دیکھتے ہوئے کیا جائیگا۔

 انہوں نے مزید کہا کہ شہری اپنی حفاظت خود کریں اور ماسک کے استعمال کو ضروری بنائیں تاکہ کسی قسم کی بھی وبائی صورتحال سے بچ سکیں۔

ڈاکٹر فیصل سلطان کا کہنا تھا کہ ماسک کا استعمال اس وقت ختم کیا جاسکتا ہے کہ جب بلکل ہی اس وباء سے نجات حاصل کرلی جائے۔

اس سے قبل وفاقی وزیر برائے منصوبہ بندی اور این سی او سی کے سربراہ اسد عمر  نے پریس کانفرنس کرتے ہوئے کہا ہے کہ پاکستان میں کورونا وباء کا پھیلاؤ کم ہو رہا ہے۔

ان کا کہنا تھا کہ کورونا سےنمٹنے کے لیے سب نے ملکر 2 سال بہترین کام کیا ہے اور اس دوران کورونا کیسزم یں مسلسل کمی آرہی ہے۔

 انہوں نے کہا کہ ان اقدامات کے باوجود روزانہ کی بنیاد پر مانیٹرنگ کریں گے اور ویکسین لگوانے کی پابندی برقرار رہے گی کیونکہ  کورونا موجود ہے۔