شاہ محمود قریشی نے کہا ہے کہ جمہوریت کی بولی لگائی جارہی ہے، جمہوریت کو دفن کیا جارہا ہے۔

وزیر خارجہ مخدوم شاہ محمود قریشی نے ملکی سیاسی صورتحال پر اپنے اہم بیان میں کہا کہ پیپلزپارٹی جمہوریت کو نقصان پہنچارہی ہے، کیش اور ڈبے سندھ ہاؤس منتقل کیے گئے ہیں۔

انہوں نے بتایا ہے کہ جتنا نقصان جمہوریت کو آج ہورہاہے تاریخ میں کبھی نہیں ہوا ہے، اپوزیشن کا یک نکاتی ایجنڈا صرف وزیراعظم عمران خان کو ہٹانا ہے۔

انہوں نے بتایا کہ آج اپوزیشن برملا ہارس ٹریدنگ کا اعتراف کر رہی ہے جس پر الیکشن کمیشن سے عرض کروں گا کہ اس کا نوٹس لے۔

وزیر خارجہ نے کہا کہ ہر منتخب نمائندے کو ووٹرز کا احساس ہوتا ہے لیکن ضمیر بچنے والے ارکان اسمبلی کو کوئی روک نہیں سکتا ہے۔

 ان کا کہنا تھا کہ عمران خان کو ہٹانے کیلئے پورے نظام کو داؤ پر لگایا جارہا ہے، دیکھنا ہے کہ عدم اعتماد کا اونٹ کس کروٹ بیٹھتا ہے۔

انہوں نے کہا کہ وزیراعظم اتحادیوں سمیت سب سے ملاقات کررہے ہیں، چوہدری برادران مناسب وقت پردرست فیصلہ کریں گے۔

ان کا مزید کہنا تھا کہ ایم کیو ایم ہمارے محترم اتحادی ہیں انہوں نے ساڑھے 3 سال میں ہمارا بھرپور ساتھ دیا ہے۔

شاہ محمود قریشی نے اپنے بیان میں بتایا ہے کہ وزیراعظم کی زیرصدارت آج اجلاس ہوگا جس میں ممبران کی بازیابی کیلئے راستہ اختیار کرنے پرغور کیا جائیگا۔