آرمی چیف جنرل قمر جاوید باجوہ نے کہا ہے کہ غلط معلومات اور پروپیگنڈہ قومی ہم آہنگی کے لیے خطرہ ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کی جانب سے لاہور کا دورہ کیا گیا ہے۔

آئی ایس پی آر کا کہنا ہے کہ دورہ لاہور کے دوران آرمی چیف نے آرٹلری کور میں ایس ایچ 15 آرٹلری گنز شامل کرنے کی تقریب میں شرکت کی ہے۔

آئی ایس پی آر کے مطابق  تقریب میں شرکت کرتے ہوئے آرمی چیف نے جدید ترین ویپن سسٹم کی شمولیت پر اظہار اطمینان کیا ہے۔

آئی ایس پی آر نے بتایا کہ تقریب کے دوران آرمی چیف کا کہنا تھا کہ زیادہ رینج والی جدید گنز کی شمولیت سے میدان جنگ کی پاک فوج کی آپریشنل تیاریوں میں اضافہ ہو گا۔

آئی ایس پی آر کے مطابق آرمی چیف نے لاہور یونیورسٹی آف مینجمنٹ سائنسز کا بھی دورہ کیا ہے  جہاں لمز کے وائس چانسلر ڈاکٹر ارشد ملک اور فیکلٹی نے آرمی چیف کا استقبال کیا ۔

آئی ایس پی آر نے بتایا کہ یونیورسٹی کے دورے کے دوران طلباء اور فیکلٹی سے گفتگو میں آرمی چیف نے پاکستان کی مستقبل کی قیادت تیار کرنے پر لمز کو سراہا۔

آئی ایس پی آر نے بتایا کہ آرمی چیف نے اپنے خیالات کا اظہار کرتے ہوئے کہا کہ پاکستان کی نوجوان نسل باصلاحیت ہے اور انسانی وسائل، جدید ٹیکنالوجی ترقی کے لیے اہم ہے۔

آئی ایس پی آر نے بتایا ہے کہ اس دوران آرمی چیف نے اس بات پر بھی زور دیا کہ دشمن قوتوں کی طرف سے غلط معلومات اور پروپیگنڈہ قومی ہم آہنگی کو خطرے میں ڈالتا ہے جس کی شناخت اور متحد ردعمل کے ذریعے اجتماعی طور پر مقابلہ کیا جانا چاہیے۔