وزیر خارجہ شاہ محمود قریشی نے کہا ہے کہ مسلم ممالک میں غیر ملکی مداخلت دہشت گردی کو ہوا دیتی ہے۔

اوآئی سی وزرائے خارجہ اجلاس کی تقریب سے خطاب کرتے ہوئے وزیر خارجہ شاہ محمود قریشی نے کہا ہے کہ پاکستان اوآئی سی کے کردار کو مزید مضبوط بنانے کا خواہاں ہے۔

ان کا کہنا تھا کہ او آئی سی کی تنظیم مسلم امہ کے درمیان اتحاد و یکجہتی کیلئے کام کررہی ہے اور یہ  2 ارب مسلمانوں کی مشترکہ آواز ہے۔

ان کا کہنا تھا کہ پاکستان نے اسلاموفوبیا کے خلاف آواز اٹھائی ہے اور آج او آئی سی اجلاس سے اسلاموفوبیا سے نمٹنے کی حکمت عملی واضع ہوگی۔

 انہوں نے بتایا کہ دنیا کے دوتہائی مہاجرین کا تعلق 5 مسلم ممالک سے ہے جہاں بیرونی مداخلت جاری ہے جس کی وجہ سے مسلم ممالک کو مشرق وسطیٰ میں تنازعات کا سامنا ہے۔

 ان کا کہنا تھا کہ مشرق اور مغرب کےدرمیان کشیدگی سے عالمی امن کو خطرہ ہے جس کے باعث دنیا کو ہنگامہ خیز صورتحال کا سامنا ہے۔

وزیر خارجہ کا اسلاموفوبیا پر اظہار خیال:

اس موقع پر وزیر خارجہ کا کہنا تھا کہ پاکستان نے اسلاموفوبیا کے خلاف آواز اٹھائی اور یو این نے ہماری آواز پر 15 مارچ کو اسلاموفوبیا کا دن مقرر کیا۔

ان کا کہنا تھا کہ اسلاموفوبیا کے واقعات سے دنیا بھر کے مسلمانوں کو تکلیف پہنچتی ہے اور اس صورتحال سے نمٹنے کیلئے فریم ورک تیار کرنے کی ضرورت ہے۔

وزیر خارجہ کا کرپشن کے خاتمے پر زور:

اس موقع پر شاہ محمود قریشی نے واضح کیا ہے کہ پاکستان سمیت دیگر مسلم ممالک میں کرپشن اہم مسئلہ ہے۔

 انہوں نے کہا کہ مسلم ممالک میں معاشی ناانصافی کے باعث مشکلات ہیں اور مالیاتی بحران سےنمٹنے کیلئے مسلم ممالک میں اچھے تعلقات بہت اہم ہیں۔

ان کا کہنا تھا کہ کرپشن ، اثاثوں کی غیر قانونی منتقلی نے مسلم ممالک کو خاصا متاثر کیا ہے، اس حوالے سے او آئی سی کے صدر کے جانب سے ایک تفصیلی رپورٹ مرتب کی جانی چاہیے ۔

 انہوں نے مطالبہ کیا ہے کہ اس رپورٹ میں اس کے تدارک کے لیے تجاویز اور اقدامات پر غور کیا جائے۔

کشمیر تنازع پر وزیر خارجہ کا بیان:

وزیر خارجہ شاہ محمود قریشی نے کشمیر تنازع پر اپنے خیالات کا اظہار کرتے ہوئے کہا ہے کہ پاکستان اور بھارت کےدرمیان مسئلہ کشمیر واحد تنازع ہے جس  کے باعث ترقی متاثر ہوتی ہے۔

 ان کا کہنا تھا کہ کشمیر اور فلسطینی گزشتہ 7 دہائیوں سے قبضے کا شکار ہیں اور اب فلسطین کی طرح کشمیر میں آبادی کا تناسب بدلنے کی کوشش ہورہی ہے۔

انہوں نے بتایا کہ مقبوضہ کشمیر کے عوام حق خودارادیت کی جنگ لڑ رہے ہیں جہاں خونریزی جاری ہے۔