قومی سلامتی کمیٹی کا کہنا ہے کہ پاکستان کے اندورنی معاملات  پر مداخلت ناقابل برداشت ہے اور سفارتی آداب کو مدنظر رکھتے ہوئے خط کا جواب دیا جائے گا۔ 

وزیراعظم عمران خان کی زیر صدارت قومی سلامتی کمیٹی کا 37 واں اجلاس کا اعلامیہ جاری کردیا گیا۔ اجلاس میں آرمی چیف جنرل قمر جاوید باجوہ، چیئرمین جوائٹ چیفس آف اسٹاف کمیٹی جنرل ندیم رضا ، سروسز چیفس اور معاون خصوصی قومی سلامتی سمیت سینیئرحکام شریک ہوئے۔

قومی سلامی کمیٹی کے اجلاس میں وزیر دفاع، وزیر توانائی، وزیر اطلاعات، وزیر خزانہ، وزیر داخلہ، وزیر برائے منصوبہ بندی اور وفاقی وزیر برائے انسانی حقوق نے بھی شرکت کی۔ قومی سلامتی کے مشیر معید یوسف کی دھمکی آمیز خط کے حوالے سے کمیٹی کو بریفنگ دی۔

اعلامیے کے مطابق قومی سلامتی کمیٹی نے غیر ملکی سینئر اہلکار  کی گفتگو پر تشویش کا اظہار کرتے ہوئے غیر ملکی اہلکار کی استعمال کی جانے والے زبان کو غیر سفارتی قراردیا۔

اعلامیے میں کہا گیا کہ غیر ملکی مراسلہ پاکستان کے اندرونی معاملات میں مداخلت ہے اور پاکستان کے اندرونی معاملات میں کسی طرح کی بھی مداخلت ناقابل برداشت ہے جب کہ سفارتی آداب کو مدنظر رکھتے ہوئے متعلقہ ملک سے بھرپور احتجاج کیا جائے گا اور سفارتی آداب کو مد نظر رکھتے ہوئے جواب دیا جائے گا۔

اعلامیے کے مطابق قومی سلامتی کمیٹی کو ایک غیر ملکی اعلیٰ عہدیدار کی پاکستانی سفیر سے ہونے والی باضابطہ بات چیت سے آگاہ کیا گیا۔

واضح رہے اسلام آباد میں ہونے والے پی ٹی آئی کے جلسے کے دوران وزیراعظم عمران خان نے اپنے خطاب کے دوران ایک خط ہوا میں لہراتے ہوئے کہا تھا کہ غیر ملکی فنڈنگ سے ہماری حکومت تبدیل کرنے کی دھمکی دی گئی ہے جس کا ثبوت میرے پاس موجود ہے۔