وزیراعلیٰ پنجاب عثمان بزدار نے صوبے میں جاری ڈویلپمنٹ پراجیکٹس پر کام کی رفتار کو مزید تیز کرنے کی ہدایت کی ہے۔

وزیراعلیٰ پنجاب سردار عثمان بزدار کی زیر صدارت اعلیٰ سطح کا اجلاس منعقد ہوا جس میں جنوبی پنجاب کی ترقی و خوشحالی کیلئے جاری اسکیموں سمیت پبلک سیکٹر ڈویلپمنٹ پروگرام کیلئے نئے منصوبو ں کا جائزہ لیا گیا۔

دوران اجلاس وزیراعلیٰ پنجاب کا کہنا تھا کہ پبلک سیکٹر ڈویلپمنٹ پروگرام کیلئے نئے پراجیکٹس سے متعلق امور جلد طے کئے جائیں اور 31 مارچ سے قبل منصوبوں کے ضروری امور طے کرکے سفارشات وفاق کو بھجوائی جائیں۔

انہوں نے بتایا کہ نیا پاکستان منزلیں آسان پروگرام کا اگلا مرحلہ جلد شروع ہوگا اور ہدایت کی ہے کہ جنوبی پنجاب میں آبپاشی کے پراجیکٹس سے متعلق امور جلد نمٹائے جائیں۔

انہوں نے واضح کیا ہے کہ نادرن بائی پاس،ڈیرہ غازی خان کے منصوبے کو بھی جلد مکمل کریں گے اور بتایا ہے کہ کرم داد قریشی سے لیہ، جام پور سے داجل اور چنیوٹ سے پنڈی بھٹیاں تک سڑکوں کی تعمیر و توسیع کے منصوبے بھی جلد شروع کئے جائیں گے۔

بہاولنگر سے منچن آباد، منچن آباد سے ڈونگہ حیات، ترنڈہ محمد پناہ سے مظفرگڑھ، ملتان سے جلال پور پیر والا اور بورے والا سے میاں چنوں کی سڑکوں کی تعمیر و توسیع کے منصوبوں کو مکمل کیا جائے گا۔

خیال رہے کہ چیئرمین منصوبہ بندی و ترقیات، سیکرٹری تعمیرات و مواصلات اور سیکرٹری آبپاشی نے منصوبوں سے متعلق بریفنگ دی۔

صوبائی وزیر خزانہ ہاشم جواں بخت، صوبائی وزیر آبپاشی محسن خان لغاری، چیف سیکرٹری، چیئرمین منصوبہ بندی و ترقیات، سیکرٹری تعمیرات، سیکرٹری آبپاشی اور متعلقہ حکام سمیت ایڈیشنل چیف سیکرٹری جنوبی پنجاب کی ویڈیو لنک کے ذریعے اجلاس میں شرکت کی۔