وزیراعظم عمران خان کے خلاف عدم اعتماد کی تحریک کے حوالے سے پی ڈی ایم کا اہم ترین سربراہی اجلاس کل طلب کرلیا گیا ہے۔

 اس حوالے سے ذرائع کا کہنا ہے کہ اجلاس میں عدم اعتماد سے متعلق پی ڈی ایم اپنی حکمت عملی طے کرے گی۔

ذرائع کے مطابق مولانا فضل الرحمان حکومتی اتحادیوں اور اپوزیشن سے ہونے والی ملاقاتوں سے پی ڈی ایم کو اعتماد میں لیں گے۔

خیال رہے کہ اجلاس پی ڈی ایم کے سربراہ مولانا فضل الرحمان کے زیرصدارت ن لیگ کے سیکریٹریٹ اسلام آباد میں ہوگا۔

اجلاس کے دوران سابق وزیر اعظم نوازشریف اجلاس میں وڈیو لنک سے شریک ہوں گے جبکہ اجلاس میں پی ڈی ایم میں شامل جماعتوں کے سربراہان شریک ہوں گے۔

واضح رہے کہ گزشتہ ہفتے وزیراعظم عمران خان کے خلاف اپوزیشن کی جانب سے تحریک عدم اعتماد جمع کرائی ہے اور ساتھ ہی اجلاس بلانے کی ریکوزیشن کی جمع کرادی گئی ہے۔

ریکوزشن جمع کرانے کے بعد اسپیکر کے پاس اجلاس بلانے کے لئے 14 روز کا وقت ہوتا ہے جس میں عدم اعتماد کے حوالے سے اراکین کو اعتماد میں لیا جاتا ہے۔

تاہم اسپیکر قومی  اسمبلی کی جانب سے اجلاس بلانے کے حوالے سے کوئی پیش رفت سامنے نہیں آئی ہے جبکہ اسد قیصر کی وزراء اور حکومتی اراکین سے ملاقاتیں جاری ہیں ۔

دوسری جانب وزیراعظم بھی اپنے اتحادیوں سے ملاقاتیں کر رہے ہیں جبکہ عوام کو اعتماد میں لینے کے لئے جلسوں کا بھی انعقاد کیا جارہا ہے۔