امیر حیدر خان ہوتی نے کہا ہے کہ اپنی سیاست کیلئے پاکستان کے ساتھ کھلواڑ کیا جا رہا ہے۔

عوامی نیشنل پارٹی کے نائب صدر امیر حیدر خان ہوتی نے اپنے ایک بیان میں کہا کہ اعلیٰ عدلیہ اپوزیشن کے اراکین پارلیمنٹ پر غداری کے الزام کی وضاحت کریں، آرٹیکل 5 کا سہارا لے کر تحریک عدم اعتماد کو مسترد کرنے والوں پر آرٹیکل 6 لگانے پر بھی گفتگو ہونی چاہیے۔

امیر حیدر نے کہا کہ پرانا بیانیہ ناکام ہو چکا ہے اس لیے اب بین الاقوامی سازش اور دھمکی کی بنیاد پر نیا بیانیہ بنایا جا رہا ہے، سب سے پہلے یہ حقیقت سامنے آنی چاہیے کہ اس خط اور دھمکی میں کتنی سچائی ہے۔

ان کا کہنا تھا کہ نیا پاکستان، دو نہیں ایک پاکستان، ریاست مدینہ، ایک کروڑ نوکریاں، پچاس لاکھ گھر والا بیانیہ پٹ چکا ہے۔

انہوں نے کہا کہ خدارا اپنی سیاست کے لیے ایسا بیانیہ نہ بنائے جس سے پاکستان تنہائی کا شکار ہو، اپنی سیاست کیلئے پاکستان کے ساتھ کھلواڑ کیا جا رہا ہے، ہم پارلیمنٹ، قانون اور سیاسی میدان میں اس جھوٹے بیانیے کا مقابلہ کریں گے۔

امیر حیدر کا کہنا تھا کہ عمران خان نے غیر جمہوری طریقے سے اپنے آپ کو عدم اعتماد سے بچانے کی کوشش کی، امید ہے یہ اسمبلیاں بحال ہوجائیں گی، انتخابی اصلاحات کے بعد نئے انتخابات کا اعلان کیا جائے گا۔