پنجاب میں نئے وزیر اعلیٰ کے انتخاب کے لئے اسمبلی کا اجلاس آج طلب کرلیا گیا ہے ۔

پنجاب اسمبلی کا اجلاس طلب کرتے ہوئے ایجنڈا بھی جاری کردیا گیا ہے جس کے مطابق وزارت اعلیٰ کے عہدے کے لئے حتمی فیصلہ آج کیا جائیگا۔

وزیر اعلیٰ پنجاب کے عہدے کے لئے مقابلہ اسپیکر پنجاب اسمبلی چوہدری پرویز الٰہی اور پنجاب اسمبلی میں اپوزیشن لیڈر حمزہ شہباز کے درمیان ہوگا۔

اس حوالے سے سیکرٹری اسمبلی کا کہنا ہے کہ آج صرف شیڈول جاری ہو گااور کوئی کارروائی نہیں ہو گی۔ا سپیکر کا اختیار ہے کہ ووٹنگ کل کرواتے ہیں یا پیر کو فیصلہ اسپیکر نے کرنا ہے۔

وزیر اعلیٰ پنجاب کے کاغذات نامزدگی کیلئے امیدوار اپنے کاغذات آج جمع کرائے گئے۔

خیال رہے کہ گزشتہ روز گورنر پنجاب چوہدی سرور  کی جانب سے وزیراعلیٰ پنجاب عثمان بزدار کا استعفیٰ منظور کیا تھا جس کے بعد وزارت اعلیٰ کا عہدہ خالی ہوگیا ہے۔

 تاہم حکومت کی جانب سے اسپیکر پنجاب اسمبلی چوہدر پرویز الٰہی کو وزیراعلیٰ کے لئے منتخب کیا گیا ہے جبکہ پاکستان مسلم لیگ ن کی جانب سے حمزہ شہباز کو نامزد کیا گیا ہے۔

گزشتہ روز پنجاب اسمبلی میں ہونے والی تبدیلوں کے باعث ق لیگ اور ن لیگ کی ترین گروپ سے حمایت حاصل کرنے کے لئے ملاقاتوں اور رابطوں کا سلسلہ جاری ہے۔

تمام ملاقاتوں کے باوجود ترین گروپ نے تاحال کوئی فیصلہ نہیں کیا ہے تاہم مسلم لیگ ن کے رہنما اسحاق ڈار نے دعوٰ کیا ہے کہ جہانگیر ترین گروپ وزیراعلیٰ کے عہدے کے لئے حمزہ شہباز کو سپورٹ کریگا۔

دوسری جانب اپوزیشن کی جانب سے عثمان بزدار کے استعفے کو غیر آئینی قرار دیتے ہوئے دوبارہ استعفیٰ دینے کا مطالبہ کیا گیا ہے۔