پولیس نے ڈی چوک پر دوبارہ شیلنگ شروع کر دی ہے جس کے باعث علاقہ میدان جنگ بن گیا ہے۔

تفصیلات کے مطابق پی ٹی آئی کے مرکزی راہنما پرویز خٹک، مراد سعید، قاسم سوری ڈی چوک پہنچے اور ڈی چوک پر رکھے کینٹینر ز پر چڑھ گئے، پی ٹی آئی کارکنوں نے ڈی چوک پر رکھا گیا دوسرا کینٹینر بھی گرا دیا۔

اسلام آباد ریڈ زون کی طرف جانے والے مارگلہ روڑ کو دونوں اطراف کنٹینر رکھ کر مکمل سیل کر دیا گیا اور ڈی چوک پر شدید آنسو گیس بھی کی گئی۔

ڈی چوک پر پولیس نے دوبارہ شیلنگ شروع کر دی، شدید لاٹھی چارج سے کئی کارکن زخمی ہو گئے۔

چیئرمین تحریک انصاف کا قافلہ منزل کی جانب پھر بھی رواں دواں ہے۔

ذرائع کے مطابق سپریم کورٹ نے پی ٹی آئی کو جی 9 اور ایچ 9 کے درمیان گرائونڈ میں جلسے کی اجازت دے دی ہے۔

واضح رہے کہ تحریک انصاف کا لانگ مارچ روکنے کے لیے مختلف شہروں میں سڑکوں پر کنٹینرز اور ٹرک کھڑے کر دیے گئے ہیں جب کہ جی ٹی روڈ اور موٹر ویز پر رکاوٹیں لگا کر لاہور اور پشاور سے اسلام آباد جانے وا لے راستے بند کر دیے گئے ہیں۔

دوسری جانب وفاقی دارالحکومت سے منسلک راولپنڈی میں میٹرو بس سروس اور پبلک ٹرانسپورٹ، بس اڈے سمیت تعیلمی اداروں کو بند کر دیا گیا ہے اور جڑواں شہروں میں آج ہونے والے پرچے بھی ملتوی کر دیے گئے ہیں۔

حکومت نے اسلام آباد میں ریڈ زون کی سیکیورٹی کے لیے پولیس، رینجرز اور ایف سی طلب کر لی ہے، ریڈ زون جانے والے تمام علاقے سیل ہیں، جس کے باعث شہریوں کو شدید پریشانی کا سامنا ہے۔