شفقت محمود نے کہا ہے کہ حکومت بنائی گئی جو چند ہفتوں کی مہمان ہے۔

سابق وفاقی وزیر شفقت محمود نے سرگودھا میں صوبائی اسمبلی اور قومی اسمبلی کے ممبرز سمیت امیدواروں سے اہم ملاقاتیں کی۔

اس موقع  پر شفقت محمود نے سرگودھا ورکرز سے خطاب کرتے ہوئے کہا کہ ہماری عوام نے شدید غم غصے کا اظہار کیا کہ کس طرح بیرونی مداخلت پر منتخب حکومت کو ہٹایا گیا، پاکستانی عوام کا ایک ہی مطالبہ ہے جس کی نمائندگی تحریک انصاف کر رہی ہے۔

سابق وفاقی وزیر نے کہا کہ جلد انتخابات کا اعلان کیا جائے، حکومت بہانے بنا رہی ہے کیونکہ عوام ان کو مسترد کرے گی۔

صدر تحریک انصاف پنجاب کا کہنا تھا کہ چھ ہفتوں میں اگر کچھ کیا گیا ہے تو ایک کام بتا دیں۔ ایک بھگوڑا جو علاج کروانے لندن گیا، وزیراعظم کا اس سے مشورہ لینا قوم کے ساتھ مذاق ہے۔

ان کا یہ بھی کہنا تھا کہ ہم پر امن مارچ کے ذریعے پاکستان میں انتخابات کا ماحول پیدا کرنا چاہتے ہیں، ایک ناجائز طاقت کے ذریعے حکومت بنائی گئی جو چند ہفتوں کی مہمان ہے۔

شفقت محمود نے کہا کہ پاکستان کے مسائل ایک کنبہ میں حل کرنے کی صلاحیت نہیں یہ چوں چوں کا مربّہ ہیں اگر 6 ہفتوں میں کام کیا تو صرف ایف آئی اے سے کیس ختم کروانے کی ناکام جہدوجہد کے سوا کچھ نہیں کیا۔

انہوں نے یہ بھی کہا کہ موجودہ چیف الیکشن کمشنر کی موجودگی میں شفاف الیکشن کی امید نہیں، چیف الیکشن کمشنر کو جانا ہوگا اور اگر الیکشن کا اعلان ہو تو اصلاحات پر بات کی جاسکتی ہے۔

شفقت محمود نے کہا کہ کرپٹ مافیا کو ملک کا سربراہ بنا دیا گیا ہے، بیرونی ممالک کی سازشیں عوام دیکھ رہی ہے۔ جہموری نظام کے لئے الیکشن جلد سے جلد ہونے چاہیئں، یہ الیکشن سے اس لئے بھاگ رہے ہیں کہ انہیں معلوم ہیں کہ عوام ان کو کبھی بھی نہیں آنے دے گی۔

سابق وفاقی وزیر اور صدر تحریک انصاف پنجاب شفقت محمود نے مزید کہا کہ عوام نے ان چوروں کے ٹولے کو ٹھکرا دیا ہے، عمران خان جس جگہ بھی جا رہے ہیں تاریخی جلسے ہو رہے ہیں۔اس مہینے کے آخر میں اسلام آباد آزادی مارچ ہوگا، سرگودھا کی عوام سے گزارش ہے کہ مارچ میں شرکت کریں۔