میر ضیاء اللہ لانگو نے کہا ہے کہ ہنگامی صورتحال میں پی ڈی ایم اے ہمہ وقت الرٹ رہتی ہے۔

مشیر داخلہ وپی ڈی ایم اے میر ضیاء اللہ لانگو نے جنگلا ت میں لگی آگ پر قابو پانے پر تمام اداروں کی کارکردگی پر اظہار اطمینان کا اظہار کرتے ہوئے کہا کہ آگ بجھانے میں فا ئیر فائیٹرز،پاک فوج اورایف سی کا شکریہ ادا کرتے ہیں۔

انہوں نے کہا کہ پی ڈی ایم اے کے عملے اور افسران نے دن رات محنت کرکے اطمینان بخش کردار ادا کیا، اللہ تعالیٰ کا شکر ہے کہ مشترکہ کاوشوں سے ایک بہت بڑے چیلنج سے نمٹا گیا۔

مشیر داخلہ وپی ڈی ایم اے کا کہناتھا کہ وزیراعلی بلوچستان خود تمام صورتحال کی نگرانی کررہے تھے، محکمہ جنگلات پی ڈی ایم اے پاک فوج ایف سی انتظامیہ مقامی لوگوں اور رضا کاروں کی آگ بجھانے کی انتھک محنت قابل تحسین ہے۔

میر ضیاء اللہ لانگو کا یہ بھی کہنا تھا کہ حکومت ایران کے مشکور ہیں جس نے فائر فائیٹر جہاز فراہم کیا جس سے آگ بجھانے میں کامیابی ہوئی، شیرانی کی جنگلات میں لگی آگ پر قابو پالیا گیا ہے۔

ان کا یہ بھی کہنا تھا کہ آگ پر بروقت قابو نہ پانے کی صورت میں بڑے پیمانے پر نقصان کاخدشہ تھا، آگ بجھانے کے بعد نقصانات کے ازالے کے لئے سروے شروع کیا جائیگا۔

انہوں نے کہا کہ سیلاب،زلزلے کے دوران ،برف باری اور بارشوں سمیت دیگر ہنگامی صورتحال میں پی ڈی ایم اے ہمہ وقت الرٹ رہتی ہے۔

مشیر داخلہ وپی ڈی ایم اے میر ضیاء اللہ لانگو کا مزید کہنا تھا کہ بلوچستان حکومت نے جاں بحق افراد کی لواحقین کو فی کس 10لاکھ روپے کا اعلان کیا ہے، آگ سے متاثرہ افراد کی امداد و بحالی کو ہر صورت یقینی بنایا جائے گا۔