سراج الحق نے کہا  ہے کہ پی ٹی آئی سمیت پی ڈی ایم ملک چلانے میں ناکام ہو چکی ہے۔

امیر جماعت اسلامی سراج الحق نے مظفرآباد میں عید  ملن پارٹی سے خطاب کرتے ہوئے کہا کہ کشمیر پاکستان کی شہ رگ ہے، کشمیری شہداء کا خون رائیگاں نہیں جائے گا۔

انہوں نے کہا کہ آئین کے آرٹیکل63-اے کی تشریح سے متعلق فیصلہ جمہوریت کی مضبوطی کی جانب قدم ہے ، اعلیٰ عدلیہ قوم کی امیدوں کا مرکز بن گئی۔

سراج الحق کا کہنا تھا کہ جماعت اسلامی اس ملک کی وارث ہے، پی ٹی آئی سمیت پی ڈی ایم ملک چلانے میں ناکام ہو چکی ہے۔

امیر جماعت اسلامی نے کہا کہ ملک کو موجودہ بحران سے نکالنے کے لیے آئین اور قانون کی بالادستی قائم کرنا ہو گی جبکہ لوٹا کریسی کلچر کے خاتمے سے ہی قوم کا جمہوریت پر اعتماد بحال ہو گا۔

انہوں نے یہ بھی کہا کہ سیاسی جماعتیں سپریم کورٹ کے فیصلے پر اس کی روح کے مطابق عمل کریں، سیاسی جماعتوں میں خاندانی اجارہ داریاں اور ون مین ڈکٹیٹرشپ قائم ہے۔

سراج الحق کا کہنا تھا کہ پاکستان 75برسوں سے سسک رہا، دو فیصد اشرافیہ نے اسے کھوکھلا کردیا، ماضی اور موجودہ حکمرانوں نے کشمیر پر بھارت کے سامنے پسپائی اختیار کی۔

امیر جماعت اسلامی سراج الحق کا مزید کہنا تھا کہ پاکستانی قوم اور جماعت اسلامی کشمیریوں کی صبح آزادی تک ان کے ساتھ کھڑی ہے، جس حکمران نے بھی کشمیریوں کے خون سے غداری کی وہ عبرت کا نشان بنے گا۔