پاکستان تحریک انصاف بلوچستان کے صدر قاسم خان سوری نے کہا ہے کہ نیب ترامیم سے سب سے زیادہ فائدہ شریف خاندان کو ہونے جا رہا ہے۔

پاکستان تحریک انصاف بلوچستان کے صدر قاسم خان سوری نے پاکستان مسلم لیگ ن کی نائب صدر مریم نواز کے بیان پر ردعمل دیتے ہوئے کہا کہ مریم صفدر جھوٹوں کی رانی ہے اس کو عدالتوں نے دس سال کے لئے نااہل کیا ہے، مریم صفدر نے جھوٹ بولا کہ میں والد کی تیمارداری کرنے جاؤں گی اور یہاں گھوم پھر کر قوم کو گمراہ کر رہی ہیں۔

ان کا کہنا تھا کہ نیب ترمیم کرنے سے چوروں کی 1100 ارب کی چوری پر کوئی ہاتھ نہیں ڈال سکے گا، نیب ترامیم سے سب سے زیادہ فائدہ مریم صفدر اور اس کے کرپٹ خاندان کو ہونے جا رہا ہے۔

انہوں نے کہا کہ کرائم منسٹر شہباز شریف کو وزیراعظم بننے والے دن جیل میں جانا تھا، ان چوروں نے اسمبلی میں بیٹھ کر  اپنے احتساب کے قوانین خود ہی بدل ڈالے، اس مافیا نے پاکستان کی خودداری کو بیچ ڈالا اور عوام پر مہنگائی کا عذاب نازل کر دیا ہے۔

ان کا یہ بھی کہنا تھا کہ ان کو مسلط کرنے والوں سے قوم یہ سوال کرتی ہے کہ عمران خان جیسے صادق و امین شخص کی جگہ ان چوروں اور لٹیروں کو ہی لانا تھا؟ چوروں کے اس گلدستے کو عمران خان کبھی نہیں چھوڑے گا اور ان کا کڑا احتساب ہو گا۔

واضح رہے اس سے قبل پاکستان مسلم لیگ (ن) کی نائب صدر مریم نواز نے سماجی رابطے کی ویب سائٹ ٹویٹر پر اپنے ایک پیغام میں کہا کہ بہت گہرا اور ناقابلِ تلافی صدمہ پہنچا ہے بیچارے کو، جتنی محنت اس نے شہباز شریف پر جھوٹے کیسز بنا کر ان کو فاؤل پلے کے ذریعے میدان سے آوٹ کرنے پر کی تھی لیکن اللّہ نے وہ چال اسی پر الٹ دی۔

انہوں نے کہا کہ عمران خان عادت ڈالو کیونکہ اب اسی حسد اور صدمے میں آپ کی باقی زندگی بھی گزرنے والی ہے، انشاءاللّہ!

مریم نواز کا کہنا تھا کہ نیند میں بھی نیوٹرل نیوٹرل کا راگ الاپا کرے گا جبکہ بڑبڑایا کرے گا کہ شہباز شریف نے سفیر کو کیک کھلایا، شہباز شریف نے شیروانی پہن لی، شہباز شریف وزیر اعظم بن گیا۔

پاکستان مسلم لیگ (ن) کی نائب صدر مریم نواز نے عمران خان پر طنز کرتے ہوئے کہا کہ عمران یہی کہتے رہیں گے، خرم دستگیر نے یہ کہ دیا، امریکا نے سازش کردی، دھاندلی ہو گئی، قسم سے ان کی ذہنی حالت پر ترس آنے لگا ہے۔