چیئرمین سینیٹ نے کہا ہے کہ موسمیاتی تبدیلی سے نمٹنے کیلئے ہمیں اپنے رویوں میں تبدیلی لانی ہوگی۔

ماحولیات کے عالمی دن کے موقع پر اپنے خصوصی پیغام میں چیئرمین سینیٹ محمد صادق سنجرانی نے کہا کہ عالمی یوم ماحولیات منانے کا مقصد ماحولیات کے حوالے سے بیداری پیدا کرنا اور تحفظ فراہم کرنا ہے۔

صادق سنجرانی کا کہنا تھا کہ بدقسمتی سے پاکستان موسمیاتی تبدیلیوں کے لحاظ سے سب سے زیادہ متاثر ہونے والے ممالک میں شامل ہے۔

چیئرمین سینیٹ نے کہا کہ موسمیاتی تبدیلی کے حوالے سے حکومت اور پاکستانی عوام کو شدید چیلنجز درپیش ہیں۔

انہوں نے یہ بھی کہا کہ ایوان بالا نے ماحول دوست اقدامات کی ہمیشہ حوصلہ افزائی کی ہے گلوبل وارمنگ اور موسمیاتی تبدیلی جیسے چیلنجز سے نمٹنے کیلئے ہمیں اپنے رویوں اور طرز زندگی میں تبدیلی لانی ہوگی۔

صادق سنجرانی کا کہنا تھا کہ اپنے آنے والی نسلوں کی حفاظت کیلئے زیادہ سے زیادہ درخت لگانا ناگزیر ہے، موسمیاتی تبدیلی سے نمٹنے کیلئے ہمیں اپنے رویوں میں تبدیلی لانی ہوگی۔

انہوں نے کہا کہ ماحولیاتی تبدیلیوں کی وجہ سے ہماری سماجی زندگی پر منفی اثرات مرتب ہوئے ہیں جن کا ہم سب کو مل کر مقابلہ کرنا ہوگا۔

چیئرمین سینیٹ محمد صادق سنجرانی نے مزید کہا کہ بحیثیت قوم ہر پاکستانی کو گلوبل وارمنگ کے خطرات سے بچنے اور ماحول کی بہتری کیلئے درخت لگانے چاہیے۔