صدر مملکت نے کہا ہے کہ جنگل کی آگ نباتات اور حیوانات کو نقصان پہنچاتی ہے۔

اپنے ایک بیان میں صدر مملکت ڈاکٹر عارف علوی نے ملک کے مختلف حصوں میں جنگلات میں آگ لگنے کے بڑھتے ہوئے واقعات پر شدید تشویش کا اظہار کیا ہے۔

ڈاکٹر عارف علوی نے کہا کہ جنگلات میں آگ کے واقعات موسمیاتی تبدیلی پر اس کے منفی اثرات کو مزید بڑھا رہے ہیں۔

صدر مملکت نے یہ بھی کہا کہ اس طرح کے واقعات قوم کو بہت زیادہ مالی نقصان پہنچا رہے ہیں جبکہ ان واقعات سے نباتات،حیوانات اور عوام کی جان و مال کو شدید خطرات لاحق ہو رہے ہیں۔

ان کا یہ بھی کہنا تھا کہ اس طرح کے واقعات جنگلی جانوروں کو ختم کرتی ہے، پرندوں کی پناہگاہیں تباہ کرتی ہے جبکہ یہ زمین کی زرخیزی کو نقصان پہنچاتی ہے جس سے سبزے کی نشوونما پر منفی اثر پڑتا ہے۔

ڈاکٹر عارف علوی نے کہا کہ ان واقعات سے فضا میں کاربن ڈائی آکسائڈ کی سطح میں بھی اضافہ ہوتا ہے، واقعات کو سادہ احتیاطی تدابیر اختیار کر کے روکا جا سکتا ہے۔

انہوں نے یہ بھی کہا کہ متعلقہ حکام جنگلات میں آگ لگنے کے واقعات کو کم کرنے کے لیے باہمی ہم آہنگی کو مضبوط بنائیں جبکہ آگ پر قابو پانے اور ان واقعات کی روک تھام دونوں میں سرمایہ کاری کی جائے۔

ڈاکٹر عارف علوی نے کہا کہ فائر مینجمنٹ کی طریقوں کو مکمل نافذ کیا جائے، ان واقعات کے ڈیٹا اکٹھا کرنے اور اس کے تجزیے کے نظام کو بہتر بنایا جائے۔

صدر مملکت ڈاکٹر عارف علوی نے مزید کہا کہ تمام اسٹیک ہولڈرز کے تعاون کو یقینی بنا کر ان واقعات کی روک تھام کی حکمت عملی پر توجہ دیں۔