ترجمان پیپلز پارٹی فیصل کریم کنڈی نے کہا ہے کہ عمران خان کے سیاسی مستقبل کا فیصلہ آصف زرداری کریں گے۔

تفصیلات کے مطابق فیصل کریم کنڈی نے عمران خان کے بیان پر رد عمل دیتے ہوئے کہا کہ عمران صاحب آپ لمبی سانسیں لیں، 10 گلاس برف والا پانی پی کر آرام کریں۔

ان کا کہنا تھا کہ عمران خان آپ بتائیں کہ آپ کا 2018 کا اقتدار جمہوریت اور اخلاقیات کی کن بنیادوں پر کھڑا تھا؟

انہوں نے کہا کہ وزیراعظم شہباز شریف شوکت خانم ٹرسٹ کا آڈٹ کرائیں۔

فیصل کنڈی نے مزید کہا کہ عمران خان 9 سال سے خیبر پختونخوا کے عوام کا خون چوس رہے ہیں۔

واضح رہے کہ سربراہ پاکستان تحریک انصاف اور سابق وزیراعظم عمران خان نے کچھ دیر قبل ایک بیان دیا جس میں ان کا کہنا تھا کہ سب نے تما شا دیکھا کہ سیاست دانوں کی بولیاں لگ رہی تھی، ہمیشہ دعا رہی کہ جمہوریت مظبوط ہو۔ عوام آج رات گھروں سے باہرنکل کرقانون کو ہاتھ میں لیے بنا پُرامن طریقے سے اپنا احتجاج ریکارڈ کرائیں۔

انہوں نے کہا کہ جمہوریت کی ایک بنیاد اخلاقیات ہوتی ہے۔ آصف زرداری نے جمہوریت کا جنازہ نکال دیا ہے، یہ لوگ سیاست دان نہیں مافیاز ہیں۔

عمران خان کا کہنا تھا کہ فیصلہ پارلیمانی لیڈرکا ہوتا ہے لہذا چوہدری شجاعت کا توخط موثرہی نہیں۔ آئین کے آرٹیکل 63 اے میں واضح لکھا ہوا ہے کہ ووٹ ڈالنے کا فیصلہ پارٹی کا پارلیمانی سربراہ کرتا ہے۔ اوراسی وجہ سے میرا لکھا ہوا خط رد کردیا گیا،جس کے بعد پارلیمانی لیڈرنے خط لکھا تھا۔

چیئرمین پی ٹی آئی نے کہا کہ جو ہوا اس سے معاشی بحران مزید بڑھے گا، عوام احتجاج کریں لیکن قانون ہاتھ میں نہ لیں اور پُرامن رہیں۔

عمران خان کا کہنا تھا کہ ہمیں اطلاعات تھیں کہ زرداری لاہورمیں پیسہ چلا رہا ہے۔ یہ ہرالیکشن میں چوری کا پیسہ چلاتا ہے۔

کل رات ضمیروں کا یہ سوداگرپہنچا۔ آصف زرداری تیس سال سے ملک کو لوٹ رہا ہے۔ آصف زرداری باہرعوام میں نکلے تولوگ انہیں انڈے ماریں گے۔

چیئرمین پاکستان تحریک انصاف کا کہنا تھا کہ بیرونی سازش کرکے ہماری حکومت کو گرایا گیا، احتجاج کرنے پر ہمارے ساتھ ظلم کیا گیا۔ سینیٹ میں بولیاں لگیں سب نے دیکھا مگرکوئی ایکشن نہیں لیا گیا۔

کرپٹ ترین لوگوں کو ملک پر مسلط کردیا گیا ہے۔ ملک کی معیشت کا برا حال ہے اورایسے اقدمات سے معاشی بحران اوربڑھے گا۔