اقتصادی رابطہ کمیٹی کے اجلاس میں ای سی سی نے پانچ لاکھ میٹرک ٹن گندم کیلئے بولی کی منظوری دے دی۔

تفصیلات کے مطابق وزیر خزانہ مفتاح اسماعیل کی زیر صدارت اقتصادی رابطہ کمیٹی کا اجلاس ہوا جس میں ای سی سی نے نیکسٹ جنریشن موبائل اسپیکٹرم کی رپورٹ کے جائزے کیلئے وزیر خزانہ کی زیر صدارت کمیٹی قائم کر دی۔

اس موقعے پر ورلڈ فوڈ پروگرام کے تحت افغانستان کیلئے 1 لاکھ 20 ہزار ٹن گندم درآمد کی منظوری دی گئی اور یہ فیصلہ کیا گیا کہ افغانستان کیلئے منگوائی جانے والی گندم کے تمام اخراجات ڈالر میں وصول کئے جائیں گے۔

اجلاس میں لمپی اسکن بیماری کو نیشنل ڈیزیز ایمرجنسی قرار دینے کیلئے متعلقہ محکموں سے مشاورت کی ہدایت کی گئی اور ای سی سی نے ٹمبر کے درآمد کنندگان کیلئے 31 اگست تک درامدی پابندی نرم کر دی۔

منعقدہ اجلاس میں افغانستان سے پاکستانی کرنسی میں درآمد کیلئے امپورٹ پالیسی اور بیرونی قرض کی ادائیگی کیلئے 1 ارب 93 کروڑ کی گرانٹ منظوری دی گئی۔

اجلاس میں وزیراعظم سستا آٹا پروگرام کی کے پی تک توسیع، یوٹیلٹی اسٹورز نیٹ ورک کی وسعت کیلئے اقدامات کی ہدایت اور ریلیف پیکیج کے تحت پانچ اشیاء کی فراہمی جاری رکھنے کیلئے مالیاتی پہلو پر غور کی بھی ہدایت کی گئی۔

ای سی سی کے اجلاس میں وفاقی وزراء، وزراء مملکت، سیکرٹریز اور دیگر اعلیٰ حکام نے شرکت کی۔