صدر لاہور چیمبر آف کامرس میاں نعمان کبیر نے کہا ہے کہ ہمارا ملک اس وقت شدید معاشی بحران کا شکار ہے۔

تفصیلات کے مطابق میاں نعمان کبیر نے میڈیا سے گفتگو کرتے ہوئے کہا کہ سیاسی عدم استحکام اور مہنگائی سمیت تجارتی خسارے سے ڈالر کی قدر میں انتہائی اضافہ ہوا ہے، 2 سے 3 ماہ میں روپے کی قدر میں تیس فیصد کمی ہوئی ہے۔

ان کا کہنا تھا کہ انڈسٹری کا انحصار امپورٹڈ مشینری اور خام مال پر ہوتا ہے، امپورٹرز اور ایکسپورٹرز کا استحصال کیا جا رہا ہے، بینک کا حال اس وقت بنیے کی دکان جیسا ہو چکا ہے، ملک اس وقت ڈوب رہا ہے اور گورنر اسٹیٹ بینک کا کوئی پتہ نہیں۔

انہوں نے کہا کہ گورنر اسٹیٹ بینک لاہور چیمبر آف کامرس کے نمائندوں سے ملاقات یا بات کرنا گوارہ نہیں کر رہے، پاکستان کا مسئلہ چیمبرز کے نمائندوں سے ملنے پر حل ہو گا، انٹر بینک ریٹ مقرر کرنے کے باوجود کمرشل بینک زائد رقم وصول کر رہے ہیں، کمرشل بینکوں نے لوٹ مار کا بازار گرم کر رکھا ہے۔

چیمبر کے صدر کا کہنا تھا کہ بینکوں کی جانب سے یہ رویہ ہمیں انڈسٹری بند کرنے پر مجبور کر رہا ہے، ہم حکومت کے ساتھ مکمل تعاون کر رہے ہیں لیکن ہمارے ساتھ بہت برا رویہ کیا جا رہا ہے، ریٹیل سیکٹر پر فکسڈ ٹیکس کا فیصلہ کیا گیا جس میں تاجروں نے بھرپور ساتھ دیا۔

ان کا کہنا تھا کہ بجلی کے بلوں پر انکم ٹیکس فکسڈ کرنے کے بجائے سیلز ٹیکس لگایا جا رہا ہے، سیاستدانوں کے آگے اب ہاتھ جوڑھ رہے ہیں کہ ملک پر رحم کیا جائے، ہم یہ نہیں جانتے اپنا رونا کس کے آگے جا کر روئیں، حکومت کی موجودگی کا علم نہیں رات کو کوئی اور صبح کوئی حکومت ہوتی ہے، ملک کو آگے لے جانے کیلئے روڈ میپ نہیں دیا جا رہا۔

انہوں نے کہا کہ خدارا تاجر برادری سمیت ملکی معیشت کو ڈوبتے ہوئے تنکے کا سہارا دیا جائے۔

علاوہ ازیں نائب صدر لاہور چیمبر حارث عتیق نے بھی میڈیا سے گفتگو کرتے ہوئے کہا کہ لاہور کی تاجر برادری نے ہر حکومت کا بھرپور ساتھ دیا، آج ملکی معیشت سیاستدانوں کی وجہ سے بدحالی کا شکار ہے، خدارا پاکستان کے بارے میں سوچا جائے تاکہ معاشی صورتحال بہتر ہو سکے، معاشی ایمرجنسی نافذ کرنا اگر ضروری ہے تو اس میں بھی حکومت کے ساتھ کھڑے ہیں۔

ان کا کہنا تھا کہ چھوٹے تاجروں کے بجلی کے بلوں میں ہزاروں روپے سیلز ٹیکس لگا دیے گئے، تاجر ہماری کال کے انتظار میں ہیں لیکن ہم ہنگامی صورتحال کی طرف نہیں جانا چاہتے۔