مسلم لیگ ن کے رہنما محمد زبیر نے کہا ہے کہ پنجاب میں تحریک انصاف کی حکومت آئی تو وفاق کیلئے بہت بڑا چیلنج ہو گا۔

تفصیلات کے مطابق محمد زبیر نے اپنے ایک بیان میں کہا کہ ایک ہفتہ پہلے عمران خان نے کہا ہمیں پارلیمنٹ چلانے کیلئے ایجنسی کو کہنا پڑتا تھا۔

ان کا کہنا تھا کہ پنجاب اور وفاق میں کسی قسم کی محاذ آرائی ملکی مفاد میں نہیں، پنجاب میں تحریک انصاف کی حکومت آئی تو وفاق کیلئے بہت بڑا چیلنج ہو گا۔

انہوں نے کہا کہ حکومت کو ایک ماہ میں بڑے فیصلے کرنے چاہئیں، بڑے فیصلے شروع ہو چکے ہیں، تھوڑی سی جھلک مریم نواز کی ٹوئٹ میں دیکھی ہو گی۔

واضح رہے کہ سماجی رابطے کی ویب سائٹ ٹوئٹر پر اپنے ایک پیغام میں مسلم لیگ ن کی نائب صدر مریم نواز شریف نے کہا کہ انصاف کے ایوان بھی دھونس، دھمکی، بدتمیزی اور گالیوں کے دباؤ میں آ کر بار بار ایک ہی بنچ کے ذریعے مخصوص فیصلے کرتے ہیں۔

ان کا کہنا تھا کہ اگر اپنے ہی دیے فیصلوں کی نفی کرتے ہیں، سارا وزن ترازو کے ایک ہی پلڑے میں ڈال دیتے ہیں تو ایسے یکطرفہ فیصلوں کے سامنے سر جھکانے کی توقع ہم سے نا رکھی جائے، بہت ہو گیا۔

اگر انصاف کے ایوان بھی دھونس، دھمکی،بدتمیزی اور گالیوں کےدباؤ میں آ کر بار بار ایک ہی بنچ کے ذریعے مخصوص فیصلے کرتےہیں،اپنے ہی دیے فیصلوں کی نفی کرتے ہیں،سارا وزن ترازو کے ایک ہی پلڑے میں ڈال دیتے ہیں تو ایسے یکطرفہ فیصلوں کے سامنے سر جھکانے کی توقع ہم سے نا رکھی جائے۔بہت ہو گیا!

— Maryam Nawaz Sharif (@MaryamNSharif) July 23, 2022

انہوں نے کہا کہ موجودہ سیاسی انتشار اور عدم استحکام کا سلسلہ اس عدالتی فیصلے سے شروع ہوتا ہے جس کے ذریعے آئین کی من مانی تشریح کرتے ہوئے اپنی مرضی سے ووٹ دینے والوں کے ووٹ نہ گننے کا حکم جاری ہوا۔

مریم نواز نے کہا کہ آج اس کی ایک نئی تشریح کی جا رہی ہے تاکہ اب بھی اسی لاڈلے کو فائدہ پہچنے جسے کل پہنچا تھا! نا منظور۔

موجودہ سیاسی انتشار اور عدم استحکام کا سلسلہ اس عدالتی فیصلے سے شروع ہوتا ہے جس کے ذریعے آئین کی من مانی تشریح کرتے ہوئے اپنی مرضی سے ووٹ دینے والوں کے ووٹ نہ گننے کا حکم جاری ہوا ۔آج اس کی ایک نئی تشریح کی جا رہی ہے تاکہ اب بھی اسی لاڈلے کو فائدہ پہچنے جسے کل پہنچا تھا!نا منظور!

— Maryam Nawaz Sharif (@MaryamNSharif) July 23, 2022