سعودی وزارت صحت نے کہا ہے کہ عازمین حج میں کووڈ 19 اور مونکی پاکس کا کوئی مریض نہیں ہے۔

سعودی وزارت صحت نے پریس کانفرنس کرتے ہوئے کہا کہ منی کے ہسپتالوں میں 53 ہزار حجاج کرام میڈیکل چیک اپ کے لئے پہنچے، جن میں سے ایک ہزار 736 حجاج کو طبی سہولیات فراہم کی گئیں۔

وزارت صحت نے کہا کہ عازمین حج میں کووڈ 19 اور مونکی پاکس کا کوئی مریض نہیں ہے پر پھر بھی حجاج کرام ماسک پہننے کی پابندی کو یقینی بنائیں۔

واضح رہے کہ مناسک حج کا آغاز آج بروز جمعرات سے ہو گیا ہے۔ رواں برس 10 لاکھ مقامی اور غیر ملکی عازمین فریضہء حج ادا کر رہے ہیں۔

لاکھوں زائرین نے مسجد الحرام میں خانہ کعبہ کا طواف کیا۔ آج زائرین نے منیٰ میں واقع خیموں کے شہر کا رخ کیا جو مسجد الحرام سے لگ بھگ پانچ کلو میٹر فاصلے پر جبل عرفات کے سامنے واقع ہے۔ یہ وہ مقام ہے جہاں پیغمبر اسلام ﷺ نے آخری خطبہ دیا تھا۔ منیٰ کے خیمے فائر پروف مواد سے تیار کردہ اور اے سی کے جدید ترین سسٹم سے آراستہ ہیں۔

سعودی حکومت زائرین حج کی صحت اور سکیورٹی کے لیے بڑے پیمانے پر اقدامات کر رہی ہے۔ زائرین کی سہولت کے لیے سعودی وزارت صحت نے مکہ اور مدینہ میں 23 ہسپتال اور 147 طبی مراکز قائم کیے ہیں۔ منیٰ میں بھی 26 طبی مراکز تیار ہیں جہاں انتہائی نگہداشت کے لیے 100 بستر جبکہ ہیٹ ویو سے متاثر ہونے والوں کے لیے 200 بستر موجود ہیں جبکہ حجاج کی دیکھ بھال کے لیے وہاں طبی عملے کے 25 ہزار افراد موجود ہیں۔