وزیر خارجہ بلاول بھٹو  نے کہا ہے کہ  افغان عوام  کے لیے فوری بین الاقوامی انسانی امداد کی ضرورت ہے۔

ترجمان دفتر خارجہ کے مطابق وزیر خارجہ بلاول بھٹو ان دنوں  شنگھائی تعاون تنظیم وزارتی کونسل اجلاس  میں شرکت کی غرض  سے ازبکستان  میں موجود ہیں۔

اس موقع پر وزیر خارجہ نے  تاجک ہم منصب سراج الدین محردین سے ملاقات  کی۔

ملاقات میں بلاول بھٹو نے کہا کہ  افغانستان میں امدادی سرگرمیاں اور دیرپا امن و استحکام کی کاوشیں تیز کرنا ہوں گی۔ افغان عوام کے لیے فوری بین الاقوامی انسانی امداد کی ضرورت ہے۔

انہوں نے مزید کہا کہ پاکستان پرامن، متحد، مستحکم اور خوشحال افغانستان کے لیے پرعزم ہے۔

 وزیر خارجہ نے ملاقات کے دوران تاجکستان سے کاسا ایک ہزار توانائی ترسیلی منصوبے کی جلد تکمیل کا معاملہ  بھی اٹھا یا۔

بلاول بھٹو نے کہا کہ  کاسا ایک ہزار پاور ٹرانسمیشن منصوبے کی جلد از جلد تکمیل کی اشد ضرورت ہے۔ علاقائی خوشحالی کے لیے سڑک اور توانائی رابطوں کی اہمیت کسی سے ڈھکی چھپی نہیں ہے۔

ترجمان دفتر خارجہ کا کہنا ہے کہ  ملاقات میں دوطرفہ تجارت، علاقائی روابط میں وسعت اور عوامی روابط مضبوط بنانے پر  بھی گفتگو ہوئی۔

وزیر خارجہ نے متنوع شعبوں میں تعاون، تجارتی وفود کے تبادلوں سے تجارت اور سرمایہ کاری  کے فروغ پر زور دیا۔

وزیر خارجہ نے شنگھائی تعاون تنظیم سمیت کثیر الجہتی فورمز پر دونوں ممالک کے درمیان دوطرفہ قریبی تعاون کو سراہا۔