وفاقی وزیر بلاول بھٹو زرداری نے کہا ہے کہ ہمیں ملک و قوم کی خوشحالی اور ترقی کے لئے کام کرنا ہوگا۔

وزیرِ خارجہ بلاول بھٹو زرداری نے عیدالاضحیٰ کے موقع پر اپنے جاری کردہ پیغام میں پاکستان سمیت پوری دنیا کے مسلمانوں کو عیدالضحیٰ کی مبارک باد پیش کی ہے۔

انہوں نے کہا کہ خوشیوں کا یہ تہوار امت مسلمہ کو ایک لڑی میں پروتا ہے کہ افریقہ سے لے کر برصغیر تک سب مسلمان ایک ہیں اور جب ہم متحد ہوکر کسی مقصد کے حصول کی کوشش کریں گے تو اسلامی ممالک سے بڑھ کر دنیا میں کوئی طاقت نہیں ہوسکتی ہے۔

انہوں نے مزید کہا کہ عیدالاضحیٰ ہمیں یاد دلاتی ہے کہ عظیم مقاصد کی خاطر بڑی سے بڑی قربانی دینے سے گریز نہ کرنے کا عزم و حوصلہ کامیابی و کامرانی کی راہیں ہموار کرتا ہے تاہم کوئی بھی قوم اور معاشرہ ایثار و قربانی کے جذبے کے بغیر اخلاقی سربلندی حاصل نہیں کر سکتاہے۔

اس موقع پر وفاقی وزیر کا کہنا تھا کہ ملک کو درپیش مسائل سے نجات دلانے کے لیے ہمیں اپنے تمام تر ذاتی و گروہی مفادات، ترجیحات اور انا کو پس پشت رکھنا ہوگا۔

انہوں نے کہا کہ عوام خوشی کے اس موقع پر کشمیری بھائیوں کو ضرور یاد رکھیں جو اپنے حق خود ارادیت کی خاطر بھارتی ظلم و جبر کا شکار ہیں۔

خیال رہے کہ لاڑکانہ چیئر مین پیپلزپارٹی بلاول بھٹو زرداری، وزیر اعلیٰ سندھ مراد علی شاہ نے گڑھی خدا بخش بھٹو میں نماز عید ادا کی۔