مسلم لیگ ق کے رہنما و اسپیکر پنجاب اسمبلی چوہدری پرویز الٰہی نے کہا ہے کہ سپریم کورٹ کا آج کا فیصلہ جمہوریت کی جیت ہے۔

چوہدری پرویز الٰہی نے صحافیو ں سے گفتگو کرتے ہوئے کہا کہ سپریم کورٹ کا فیصلہ آئین اور قانون کی بھی جیت ہے، بے شک وہی ہو گا جو اللہ کو منظور ہو گا۔

ان کا کہنا تھا کہ جو چیزیں ہم چاہتے تھے وہ مانی گئی ہیں، پنجاب اسمبلی کا اجلاس رولز کے مطابق ہو گا کوئی پسند ناپسند نہیں ہو گی، حمزہ شہباز نے بھی کہا ہے کہ کوئی سیاسی مداخلت اور پولیس استعمال نہیں کی جائے گی۔

انہوں نے کہا کہ 22 جولائی تک ہاوس مکمل ہو جائے گا پھر الیکشن ہو گا اور اس ہی دن اجلاس اسمبلی کی بلڈنگ میں ہو گا اور کہیں نہیں ہو گا۔

چوہدری پرویز نے کہا کہ جو ماحول عدالت کے اندر بنا وہ عدالت کے باہر بھی رہنا چاہیے یہی جمہوریت ہے۔

واضح رہے کہ  وزیراعلی پنجاب کے انتخاب میں ووٹوں کی دوبارہ گنتی سے متعلق سماعت میں سپریم کورٹ نے حمزہ شہباز اور اسپیکر پنجاب اسمبلی چوہدری پرویزالٰہی کو سپریم کورٹ لاہور رجسٹری میں ویڈیو لنک سے سماعت میں طلب کیا۔

چیف جسٹس عمر عطا بندیال نے کیس کی سماعت کرتے ہوئے فیصلہ دیا کہ وزیراعلیٰ پنجاب کا دوبارہ انتخاب 22 جولائی کو ہو گا، 22 جولائی تک وزیر اعلیٰ حمزہ شہباز شریف ہی رہیں گے۔