پی ٹی آئی کے رکن سندھ اسمبلی راجہ اظہر نے کہا ہے کہ رہنما ایم کیو ایم پاکستان عامر خان مجھ سے معافی مانگیں۔

کراچی کے علاقے کورنگی میں پیش آئے واقعے سے متعلق عامر خان کے بیان پر ردعمل دیتے ہوئے راجا اظہر نے کہا کہ میں کورنگی میں پیش آنے والے تصادم میں موجود نہیں تھا۔

انہوں نے کہا کہ عامر خان نے میرا نام لیا ہے، اب ثابت بھی کریں، ورنہ مجھ سے معافی مانگیں، اگر عامر خان نے ثابت نہیں کیا تو میں قانونی کارروائی کروں گا۔

پی ٹی آئی ایم پی اے نے مزید کہا کہ ایم کیو ایم اب کراچی سے ختم ہوگئی ہے۔

عامر خان کا بیان

کورنگی جے ایریا میں ٹاؤن آفس پر ہنگامہ آرائی کے معاملے پر ایم کیو ایم پاکستان کے رہنما عامر خان اور وسیم اختر رات گئے کورنگی پہنچ گئے تھے۔

عامر خان نے اپنے جاری کردہ بیان میں کہا تھا کہ حملہ جماعت اسلامی کے دہشت گردوں نے کیا، پی ٹی آئی کے ایم پی اے راجہ اظہر بھی مشتعل افراد کے بیچ موجود تھے، انہوں نے لوگوں کواکسایا۔

انہوں نے مزید کہا کہ میرے اور وسیم اختر کے بیچ جھگڑے کے باتیں بےبنیاد ہیں، اس وقت ہم دونوں ساتھ موجود ہیں۔

کورنگی، سیاسی جماعت کارکنوں اور علاقہ مکینوں کے درمیان تصادم

کورنگی تھانے کی حدود جے ایریا میں رات گئے سیاسی جماعت کارکنوں اور علاقہ مکینوں کے درمیان تصادم ہوا۔

ذرائع کے مطابق علاقہ مکین پانی کے شدید بحران کی شکایت لے کر ٹاؤن آفس گئے تھے، اس دوران ایم پی اے آفس میں تلخ کلامی ہوئی جو جھگڑے میں تبدیل ہو گئی۔

سیاسی کارکنوں کی جانب سے مکینوں پر ڈنڈوں، لاتوں اور گھونسوں کی بارش اور ہوائی فائرنگ بھی کی گئی۔

خیال رہے کہ تصادم کے وقت فائرنگ کی وڈیو منظر عام پر آگئی فائرنگ سے ایک شخص زخمی ہوا۔

دوسری جانب سیاسی جماعت کے ذرائع کے مطابق کورنگی ٹاؤن آفس میں مشتعل عوام نے حملہ کر کے توڑ پھوڑ کی، اطلاع ملنے پر سیاسی جماعت کے کارکنان بھی پہنچ گئے، واقعے کے بعد علاقے میں کشیدگی پھیل گئی۔