مقبوضہ جموں و کشمیر میں بھارتی فوجی محاصرے کو آج 03 سال مکمل ہوجائیں گے۔

پاکستان بھر میں آج یوم استحصال منایا جارہا ہے تاکہ بھارتی غیر قانونی طور پر مقبوضہ جموں و کشمیر کے بھارتی فوجی محاصرے کو اور اس کی خصوصی حیثیت کو ختم کرنے کے غیر قانونی، غیر اخلاقی اور غیر آئینی اقدام کی مذمت کی جائے۔

حکومت نے یوم استحصال کے موقع پر اور مظلوم کشمیریوں سے اظہار یکجہتی کے لیے سیمینارز اور کانفرنسز سمیت متعدد سرگرمیوں کا منصوبہ بنایا ہے جب کہ ان کی حمایت میں ملک بھر میں ریلیاں نکالی جائیں گی جس میں تمام طبقہ ہائے زندگی سے تعلق رکھنے والے افراد کی بھرپور شرکت ہوگی۔

پوری قوم اپنے کشمیری بھائیوں کو یہ پیغام دے گی کہ پاکستانی عوام ان کی حق آزادی کی منصفانہ جدوجہد اور بھارتی افواج کے مظالم کے خلاف ہمیشہ ان کے ساتھ کھڑی رہے گی۔

ملک بھر میں صبح نو بجے ایک منٹ کی خاموشی اختیار کی جائے گی، اسکے علاوہ اسلام آباد اور دیگر صوبائی دارالحکومتوں کی اہم سڑکوں پر کشمیریوں کی حالت زار کو اجاگر کرنے اور قابض افواج کی طرف سے ڈھائے جانے والے مظالم کو اجاگر کرنے کے لیے پوسٹرز اور بل بورڈز آویزاں کیے گئے ہیں۔

صدرر مملکت کا پیغام :

یوم استحصال کے موقع پر اپنے پیغام میں صدر مملکت ڈاکٹر عارف علوی نے کہا کہ ہم کشمیریوں کی حق خودارادیت کی منصفانہ جدوجہد میں ان کی قربانیوں کو خراج تحسین پیش کرتے ہیں۔

صدر مملکت ڈاکٹر عارف علوی کا 05 اگست 2022ء کو یوم استحصال کے موقع پر پیغام

5 اگست 2019ء کو بھارت کے غیر قانونی اور یکطرفہ اقدامات کے تین سال مکمل ہونے کے موقع پر ہم کشمیریوں کے حق خودارادیت کی منصفانہ جدوجہد میں ان کی قربانیوں کو خراج تحسین پیش کرتے ہیں، صدر مملکت pic.twitter.com/z832lWlRO4

— The President of Pakistan (@PresOfPakistan) August 5, 2022

عارف علوی نے کہا کہ پاکستان اپنے کشمیری بھائیوں اور بہنوں کی منصفانہ جدوجہد میں ان کے ساتھ کندھے سے کندھا ملا کر کھڑا رہے گا۔

انہوں نے عالمی برادری سے مطالبہ کیا کہ وہ مقبوضہ جموں و کشمیر میں انسانی حقوق کی اس کی سنگین اور وسیع پیمانے پر خلاف ورزیوں کے لیے ہندوستان کو جوابدہ بنانے کے لیے عملی اقدامات کرے اور اس دیرینہ تنازعہ کے پرامن حل میں سہولت فراہم کرے۔

وزیراعظم کا پیغام :

یوم استحصال کے موقع پر اپنے پیغام میں وزیر اعظم شہباز شریف نے کہا کہ بھارت غیر قانونی طور پر مقبوضہ جموں و کشمیر کے عوام اور ان کے حق خودارادیت کے حصول کی منصفانہ جدوجہد کو دبا رہا ہے جس کی اقوام متحدہ کی سلامتی کونسل کی متعدد قراردادوں کے تحت ضمانت دی گئی ہے۔

Advertisement

Today marks the 3rd sombre anniversary of India’s illegal and unilateral actions of 5 August 2019 that aimed at changing the internationally recognized disputed status of occupied Jammu and Kashmir and altering the demographic structure of the occupied territory.

— Shehbaz Sharif (@CMShehbaz) August 5, 2022

وزیر اعظم نے کہا کہ جموں و کشمیر کا تنازعہ سات دہائیوں سے زیادہ عرصے سے اقوام متحدہ کے ایجنڈے پر ہے۔ اس دیرینہ تنازعہ کو فوری اور ذمہ داری کے احساس کے ساتھ حل کیا جانا چاہیے۔

انہوں نے کہا کہ اضافی فوجیوں کی تعیناتی اور میڈیا پر بے مثال پابندیاں لگا کر، 5 اگست 2019 سے، بھارتی قابض افواج نے مقبوضہ جموں و کشمیر کو کرہ ارض کی سب سے بڑی جیل میں تبدیل کر دیا ہے۔

وزیر خارجہ کا پیغام:

 یوم استحصال پر اپنے پیغام میں انہوں نے کہا کہ کشمیریوں کی تین نسلیں متنازعہ سرزمین پر عالمی برادری اور اقوام متحدہ کی جانب سے اپنے پختہ وعدوں کی پاسداری کا انتظار کر رہی ہیں۔

وزیر خارجہ بلاول بھٹو زرداری نے اقوام متحدہ پر زور دیا ہے کہ وہ کشمیری عوام کو حق خودارادیت دینے کے اپنے وعدے پر عمل کرے۔

انہوں نے کہا کہ عالمی برادری کو چاہیے کہ وہ بھارت کی جانب سے غیر قانونی طور پر مقبوضہ جموں و کشمیر میں انسانی حقوق کی سنگین خلاف ورزیوں کے خاتمے، 5 اگست کے یکطرفہ اور غیر قانونی اقدامات کو واپس لینے، سخت قوانین کی منسوخی اور جموں و کشمیر پر اقوام متحدہ کی سلامتی کونسل کی قراردادوں پر عمل درآمد کا مطالبہ کرے۔

بلاول بھٹو زرداری نے کہا کہ پاکستان کا حتمی مقصد اقوام متحدہ کی قراردادوں اور کشمیری عوام کی امنگوں کے مطابق دیرینہ تنازعہ کا پرامن حل ہے۔

انہوں نے کہا کہ نتیجہ پر مبنی مصروفیت کے لیے سازگار ماحول پیدا کرنے کی ذمہ داری ہندوستان پر باقی ہے۔

پس منظر:

5 اگست 2019 کو مودی کی زیر قیادت بھارتیہ جنتا پارٹی کی حکومت نے بھارتی آئین کے آرٹیکل 370 اور 35A کو ختم کر دیا، اس طرح اس قانون کو ختم کر دیا جس نے کشمیر کو اس کی خصوصی حیثیت دی تھی۔