امیر تحریک لبیک پاکستان حافظ سعد حسین رضوی نے کہا ہے کہ بھارتی غیر قانونی اقدامات خطے کے امن و استحکام کو تباہی کی جانب دھکیل رہے ہیں۔

تفصیلات کے مطابق یوم استحصال کشمیر کے موقع پر امیر تحریک لبیک پاکستان حافظ سعد حسین رضوی نے اہم بیان دیتے ہوئے کہا کہ بھارت نے آرٹیکل 370 اور 35 اے میں تبدیلی کر کے اقوام متحدہ کی قراردادوں کو پامال کیا ہے۔

مودی حکومت نے کشمیریوں پر ظلم کا ایک نیا دور شروع کیا

ان کا کہنا تھا کہ مودی حکومت نے مقبوضہ جموں کشمیر کی قانونی حیثیت تبدیل کر کے کشمیریوں پر ظلم کا ایک نیا دور شروع کیا، مقبوضہ کشمیر پر بھارت کا غیر قانونی قبضہ صدی کے سب سے بڑے انسانی بحران اور المیے میں تبدیل ہو چکا ہے۔

پاکستان کشمیریوں کے ساتھ مضبوطی سے کھڑا ہے

انہوں نے کہا کہ پاکستان کشمیریوں کے ساتھ مضبوطی اور ولولے کے ساتھ کھڑا ہے بھارت کو اس کے ہر ظلم کا جوابدہ ہونا پڑے گا، نہتے کشمیریوں کو خون میں نہلایا جا رہا ہے اور حوا زادیوں کی معصومیت کو پاؤں تلے روند دیا جا رہا ہے۔

کشمیریوں کو قید و بند کی سختیوں کا سامنا کرنا پڑ رہا ہے

سعد رضوی نے کہا کہ کشمیریوں کو قید و بند کی سختیوں کا سامنا کرنا پڑ رہا ہے اور ان پر آتش فشاں کی بارش کی جا رہی ہے، کشمیریوں کی عادلانہ جدوجہد کی سیاسی، اخلاقی اور سفارتی حمایت ہمیشہ جاری رکھیں گے۔