وزیر اعلیٰ پنجاب چودھری پرویز الٰہی نے کہا ہے کہ سیلاب کے متاثرین کی مدد کرنا ہی اصل سیاست ہے۔

تفصیلات کے مطابق وزیر اعلیٰ پنجاب چودھری پرویز الٰہی سے سابق وفاقی وزیر شیخ رشید احمد نے ملاقات کی جس میں باہمی دلچسپی کے امور اور سیلاب سے پیدا ہونے والی غیر معمولی صورتحال پر گفتگو ہوئی۔

چودھری پرویز الہی نے اس موقعے پر کہا کہ سیلاب متاثرہ علاقوں کی بحالی کیلئے ممکنہ وسائل بروئے کار لا رہے ہیں، چیئرمین پی ٹی آئی عمران خان سے متاثرین کے لئے مالی امداد کی اپیل کیلئے کہا ہے، مصیبت میں گھرے بہن بھائیوں کو تنہا نہیں چھوڑیں گے۔

ان کا کہنا تھا کہ جنوبی پنجاب، بلوچستان، کے پی کے اور سندھ میں تباہی پر ہر آنکھ اشکبار اور دل دکھی ہے، انسانی المیت کو روکنے کیلئے سب کو مل کر مشترکہ اور مربوط انداز میں بحالی کا کام کرنا ہے، راولپنڈی میں مدر اینڈ چائلڈ ہسپتال کو جلد از جلد پایہ تکمیل تک پہنچایا جائے گا، راولپنڈی میں گرلز ڈگری کالج پراجیکٹ کو بھی جلد مکمل کریں گے۔

شیخ رشید نے کہا کہ سیلاب متاثرین کی بحالی کیلئے اجتماعی کاوش ضروری ہے، مصیبت زدگان کی مدد ہر صاحب استطاعت کیلئے فرض ہے، ہنگامی حالات میں حکومت پنجاب کے اقدامات قابل تحسین ہیں۔

ملاقات میں سابق وفاقی وزیر مونس الٰہی اور پرنسپل سیکرٹری وزیر اعلیٰ محمد خان بھٹی بھی موجود تھے۔