سابق وزیر خزانہ شاکت ترین نے کہا ہے کہ مفتاح صاحب اگر آپ بجٹ سے اب تک کے پی حکومت کے خدشات کو دور کرتے تو تیمور جھگڑا آپ کو خط نہ لکھتے۔

شوکت ترین کا کہنا تھا کہ شتر مرغ نہ بنیں اور اپنی تمام ناکامیوں کا الزام تحریک انصاف پر ڈالنے کے بجائے ان کو حل کریں، آپ کی ناکامیوں کو اب آپ کے اپنے ساتھی بھی اجاگر کر رہے ہیں بہتر ہے کہ مسئلے کو حل کریں۔

سابق وزیر خزانہ و رہنما پاکستان تحریک انصاف کا کہنا تھا کہ چاروں صوبوں میں سیلاب نے تباہی مچا رکھی ہے، لاکھوں لوگ اپنے گھروں اور فصلوں سے محروم ہو چکے ہیں۔

انہوں نے کہا کہ امیروں کے لیے متاثرین تک دل کھول کر پہنچنے کا وقت ہے، ہمیں بحیثیت قوم اکٹھا ہونا چاہیے۔

خیبر پختوانخوا کا وفاقی حکومت سے مالی مسائل حل کرنے کا مطالبہ

خیبر پختوانخوا کے وزیر خزانہ تیمور خان جھگڑا نے وزیر خزانہ مفتاح اسماعیل کو خط لکھا ہے اور صوبے کے مالی مسائل حل کرنے کا وعدہ پورا کرنے مطالبہ کیا ہے۔

وفاقی وزیرخزانہ مفتاح اسماعیل کو لکھے گئے خط میں کہا گیا ہے کہ مسائل حل نہ کرنے سے صوبائی بجٹ پر 100 ارب کا اضافی بوجھ پڑے گا۔

وزیر خزانہ خیبر پختوانخوا کی جانب سے لکھے گئے خط میں مزید کہا گیا ہے کہ خیبر پختون خوا کے کئی اضلاع کو سیلاب کی تباہ کاریوں کا سامنا ہے، ریسکیو، ریلیف اور بحالی کیلئے اربوں روپے کی لاگت درکار ہوگی۔

اشیا کی قیمتوں میں اضافہ  

شوکت ترین کا کہنا تھا کہ گزشتہ سال کے مقابلے ٹماٹر کی قیمتوں میں 178 فیصد، پیاز کی قیمتوں میں 155 فیصد اضافہ ہوا ہے۔

انہوں نے بتایا کہ دال مسور کی قیمتوں میں 91 فیصد اضافہ ہوا، اس کے علاوہ پٹرولیم اور بجلی کی قیمتوں میں ہوشربا اضافے ہوئے ہیں۔

فصلوں کی انشورنس

سابق وزیر خزانہ و رہنما پاکستان تحریک انصاف کا کہنا تھا کہ ہم کافی عرصے سے فصلوں کی انشورنس پر بحث کر رہے ہیں، اب وقت ہے کہ 25 ایکڑ یا اس سے کم زمین والے کسانوں کو سیلاب، خشک سالی اور ٹڈی دل کے حملوں جیسی آفات کے لیے فصل کا بیمہ فراہم کیا جائے۔

انہوں نے کہا کہ اس پر ایک سال میں 50 بلین روپے سے زیادہ لاگت نہیں آئے گی، اس حالات میں صوبوں کو صحت کارڈ کی طرح فنڈ دینا چاہیے۔