وزیر اعظم آزاد کشمیر سردار تنویر الیاس کا کہنا ہے کہ ہندوستان کے مظالم کے باوجود کشمیری بھرپور احتجاج کررہے ہیں۔

وزیر اعظم تنویر الیاس نے  5 اگست یومِ استحصال کشمیر کے موقع پر پیغام دیتے ہوئے کہا کہ آج پوری دنیا میں مقیم کشمیری اور پاکستانی پانچ اگست کے ہندوستان کے اقدام کے خلاف سراپا احتجاج ہیں۔

ہندوستان کا دنیا کے تمام قوانین کو ماننے سے انکار

انہوں نے کہا کہ ہندوستان نے دنیا کے تمام قوانین کو ماننے سے انکار کر دیا ہے اور نو لاکھ درندہ فوج کو مقبوضہ کشمیر پر ظلم وستم کے لیے چھوڑ دیا۔

تنویر الیاس نے کہا کہ کشمیریوں کے حوصلے بلند ہیں، ہندوستان کے مظالم کے باوجود کشمیری بھرپور احتجاج کر رہے ہیں۔

پاکستان اقوام متحدہ کی قراردادوں پر عمل پیرا

وزیراعظم آزاد کشمیر کا کہنا ہے کہ جنگ عظیم دویم نے ہتھاروں کی جنگ کو مسترد کر دیا تھا اور غرور کو خاک کر دیا ہے، پاکستان اقوام متحدہ کی قراردادوں پر عمل پیرا ہے لیکن ہندوستان کی ہندوتوا سوچ ان سے انحراف کر رہی ہے۔

انہوں نے کہا کہ ہم پاکستانی اور کشمیری یہ یقین رکھتے ہیں کہ کشمیر ناقابل تقسیم وحدت ہے، کشمیر کے تمام جغرافیای راستے پاکستان سے ملتے ہیں۔

ہندوستان کے تمام پیکجز مسترد

تنویر الیاس نے کہا کہ ہندوستان کے تمام پیکجز کو کشمیریوں نے مسترد کر دیا ہے، کشمیری ہندوستان کے تمام پیکجز کو جوتے کی نوک پر رکھتے ہیں۔

وزیراعظم آزاد کشمیر نے مزید کہا کہ ہم مطالبہ کرتے ہیں کہ اقوام عالم آگے آئیں اور ریفرنڈم کروائیں، کشمیری حسین ؓ کے راستے پر چلنے والے ہیں۔

مقبوضہ جموں و کشمیر میں بھارتی فوجی محاصرے کو آج 03 سال مکمل ہوجائیں گے, پاکستان بھر میں آج یوم استحصال منایا جارہا ہے تاکہ بھارتی غیر قانونی طور پر مقبوضہ جموں و کشمیر کے بھارتی فوجی محاصرے کو اور اس کی خصوصی حیثیت کو ختم کرنے کے غیر قانونی، غیر اخلاقی اور غیر آئینی اقدام کی مذمت کی جائے۔

حکومت نے یوم استحصال کے موقع پر اور مظلوم کشمیریوں سے اظہار یکجہتی کے لیے سیمینارز اور کانفرنسز سمیت متعدد سرگرمیوں کا منصوبہ بنایا ہے جب کہ ان کی حمایت میں ملک بھر میں ریلیاں نکالی جائیں گی جس میں تمام طبقہ ہائے زندگی سے تعلق رکھنے والے افراد کی بھرپور شرکت ہوگی۔

پوری قوم اپنے کشمیری بھائیوں کو یہ پیغام دے گی کہ پاکستانی عوام ان کی حق آزادی کی منصفانہ جدوجہد اور بھارتی افواج کے مظالم کے خلاف ہمیشہ ان کے ساتھ کھڑی رہے گی۔