صدر مملکت ڈاکٹر عارف علوی نے کہا ہے کہ امدادی ورکرز کی بےلوث خدمت اور عزم ہم سب کیلئے ایک مثال ہے۔

انسانی ہمدردی کے عالمی دن کے موقع پر اپنے پیغام میں عارف علوی نے انسانی ہمدردی کے کام کرنے والے کارکنوں کو خصوصی خراج تحسین پیش کیا جو موسمیاتی بحرانوں سے متاثرہ کمیونٹیز کو زندگی بچانے میں مدد فراہم کرتے رہتے ہیں۔

صدر مملکت کا ماحولیاتی انصاف کو تمام کوششوں کی بنیاد پر رکھنے کا اعادہ

انہوں نے اس عزم کا اعادہ کیا کہ ماحولیاتی انصاف کو تمام کوششوں کی بنیاد پر رکھا جائے گا اور اس سلسلے میں بامعنی اقدامات کیے جائیں گے۔

عارف علوی کا پاکستانیوں کے انسان دوستی اور اسکے جذبے کا اعتراف

صدر مملکت نے پاکستانیوں کے انسان دوستی اور انسان دوستی کے جذبے کا اعتراف کیا جنہوں نے ہمیشہ قدرتی آفات بالخصوص زلزلوں اور سیلاب کے دوران اپنے بھائیوں کی مدد کی۔

انہوں نے کہا کہ حال ہی میں پاکستان کو درپیش موسمیاتی آفات میں غیر معمولی اضافے کے ساتھ، پاکستان میں کمزور افراد کو پہلے سے کہیں زیادہ انسانی امداد اور تحفظ کی ضرورت ہے۔

ڈاکٹر عارف علوی نے کہا کہ موسمیاتی تبدیلیوں کے نتیجے میں آنے والی آفات نے جبری نقل مکانی، غذائی قلت کی بلند شرح، شرح اموات میں اضافہ اور آبادی کے کمزور طبقات کو معاشی اور مالی طور پر بری طرح متاثر کیا ہے۔

صدر مملکت کا اپنی انفرادی کوششوں کے ذریعے ایک دوسرے کو متاثر کرنے کا عہد

انہوں نے مزید کہا کہ آئیے ہم ایک کمیونٹی کے طور پر عہد کریں کہ ہم اپنی انفرادی کوششوں کے ذریعے ایک دوسرے کو متاثر کریں اور دوسروں کی بھلائی کے لیے تبدیلی لانے کے لیے اجتماعی کوششیں کریں۔

انسانی ہمدردی کا عالمی دن

انسانی ہمدردی کا آج عالمی دن منایا جارہا ہے جس کامقصد فلاحی کام کرنے والوں کو خراج تحسین پیش کرنا ہے جواپنی زندگیوں کو خطرے میں ڈال کر انسانی خدمت کافریضہ انجام دے رہے ہیں۔

کورونا بحران کے دوران یہ دن اس لیے بھی اہم ہے کیونکہ دنیا بھر میں صحت ورکرز خود کو خطرے میں ڈال کر دوسروں کی جانیں بچانے کے لیے جدو جہد کر رہے ہیں۔

دن منانے کا مقصد دنیا بھر میں مختلف بحرانوں سے متاثرہ افراد کے ساتھ یکجہتی کا اظہار بھی کرنا ہے۔