وزیر دفاع خواجہ محمد آصف نے کہا ہے کہ سیاست میں تہذیب کو فروغ دیا جائے۔

تفصیلات کے مطابق وزیر دفاع خواجہ محمد آصف نے میڈیا سے گفتگو کرتے ہوئے کہا کہ لسبیلہ حادثے پر افسران کی شہادتوں پر پی ٹی آئی ردعمل 75 سالہ سیاسی تاریخ میں گری ہوئی حرکت تھی۔

“رنج و غم کا ایک اپنا تقدس ہوتا ہے”

ان کا کہنا تھا کہ رنج و غم کا ایک اپنا تقدس ہوتا ہے، شہید ملک و قوم کی خدمت کرتے ہوئے جان قربان کرتے ہیں انہیں سیاسی موضوع بنانا پستی کی انتہا ہے، اسے سیاست نہیں کہتے اسے کچھ اور کہتے ہیں۔

“دشمن کی خواہش ہے کہ ہمارا دفاع کمزور ہو”

انہوں نے کہا کہ چند میل پر واقع سرحد کے اس پار دشمن کی خواہش ہے کہ ہمارا دفاع کمزور ہو، ہمارے عسکری اور سول اداروں اور عوام نے اس دشمن کے ساتھ جنگ کی اور جانیں قربان کی۔

“جب احسان فراموشوں سے اقتدار چھن جائے تو وہ گالی گلوچ پر آجاتے ہیں”

خواجہ محمد آصف نے کہا کہ جن لوگوں نے سوشل میڈیا پر ٹوئٹس اور پوسٹیں کی ان کی باقاعدہ مالی سرپرستی کی جاتی ہے، گزشتہ 75 سالوں میں وہ اقتدار میں آئے جنہیں عوام نے منتخب کیا، کئی انتخابات مینج ہوئے، ایک شخص کو 2018 میں اقتدار ملا، کیسے ملا اس کی تفصیل میں جانے کی ضروت نہیں، احسان فراموشوں سے جب اقتدار چھن جاتا ہے تو وہ گالی گلوچ کی سیاست پر آجاتے ہیں۔

“یہ ادارے ہماری سرحدوں کی حفاظت کرتے ہیں”

ان کا کہنا تھا کہ یہ ادارے ہماری سرحدوں کی حفاظت کرتے ہیں، اخلاق کا دامن ہاتھ سے چھوڑ کر ننگی زبانیں سوشل میڈیا پر استعمال کی جا رہی ہیں، اداروں سے اختلافات ہوتے تھے لیکن ایسی زبانیں استعمال نہیں کی جاتی تھیں۔

“ہمارے اداروں کے تقدس کو اقتدار کے ساتھ مشروط نہ کیا جائے”

انہوں نے کہا کہ قانونی ادارے نیب، پولیس اگر ان کے سیاسی مخالفیں کے خلاف استعمال ہو رہے ہوں تو سب ٹھیک ہے، ہمارے اداروں کے تقدس کو اقتدار کے ساتھ مشروط نہ کریں۔

“یہ معاشرہ تباہ ہوا تو ملک بھی تباہ ہو جائے گا”

وفاقی وزیر نے کہا کہ سیاست میں تہذیب کو فروغ دیا جائے، یہ معاشرہ تباہ ہوا تو ملک بھی تباہ ہو جائے گا، ملک کو اب ازلی دشمن سے خطرہ نہیں جتنا اندرونی دشمن سے خطرہ ہے۔