وزیراعظم آزاد جموں و کشمیر سردار تنویر الیاس خان نے 5 اگست کے حوالے سے خصوصی پیغام دیا ہے۔

تفصیلات کے مطابق سردار تنویر الیاس نے اپنے جاری کردہ پیغام میں کہا کہ بھارت نے 5 اگست 2019 کو ایک ایسا قدم اٹھایا جو نہ صرف اقوام متحدہ کی قراردادوں کے خلاف تھا بلکہ ہندوستان کی اقوام متحدہ میں کشمیریوں کے حوالے سے کیے گئے وعدے کے خلاف تھا۔

ان کا کہنا تھا کہ مودی سرکار کی طرف سے ریاست جموں و کشمیر کی خصوصی حیثیت ختم کر کے ریاست جموں و کشمیر کو بھارتی وفاق کے زیر انتظام دو حصوں میں تقسیم کیا گیا، بھارت کے 5 اگست کے اقدام کا مقصد مقبوضہ وادی میں غیر ریاستی باشندوں کو آباد کر کے کشمیریوں کی اکثریت کو اقلیت میں بدلنا ہے۔

انہوں نے کہا کہ کشمیر ناقابل تقسیم خطہ ہے، اس کا فیصلہ کشمیری عوام کریں گے کہ وہ کس کے ساتھ رہنا چاہتے ہیں۔

سردار تنویر الیاس نے کہا کہ 5 اگست 2019 کے بعد بھارت اب تک تقریباً بیالیس لاکھ غیر ریاستی افراد کو کشمیر کا ڈومیسائل جاری کر چکا ہے جس کا مقصد استصواب رائے میں کشمیریوں کی آواز کو دبانا ہے، بھارت نے کشمیر کو جیل میں تبدیل کر رکھا ہے آئے روز کشمیری عوام پر طرح طرح کے ظلم ڈھائے جا رہے ہیں، کشمیریوں کے بنیادی حقوق صلب کیے جا رہے ہیں۔

ان کا کہنا تھا کہ طاقت کے استعمال سے کشمیریوں کی آواز دبانے میں ناکامی کے بعد اب مودی سرکار کشمیر میں بیرونی سرمایہ کاری کے ذریعے عوام کی رائے بدلنے کی کوشش کر رہی ہے مگر کشمیری ایسے تمام ہتھکنڈوں کو مسترد کر رہے ہیں۔

انہوں نے مزید کہا کہ بیس کیمپ کی حکومت اور عوام اپنے مظلوم و محکوم کشمیری عوام کے ساتھ ہے، دونوں اطراف کے کشمیریوں کی آواز صرف پاکستان ہے۔