توشہ خانہ ریفرنس میں الیکشن کمیشن کی جانب سے عمران خان کو جواب جمع کرانے کیلئے مزید ایک ہفتے کا وقت دے دیا گیا ہے۔

تفصیلات کے مطابق توشہ خانہ ریفرنس میں چیف الیکشن کمشنر کی زیر صدارت پانچ رکنی بینچ نے عمران خان کی نااہلی کی درخواست پر سماعت کی۔

سماعت کے دوران محسن شاہنواز رانجھا، علی گوہر الیکشن کمیشن پیش ہوئے، اسپیکر قومی اسمبلی کی جانب سے خالد اسحاق الیکشن کمیشن میں پیش ہوئے اور عمران خان کی جانب سے بیرسٹر گوہر الیکشن کمیشن پیش ہوئے۔

سماعت کے آغاز پر ہی عمران خان کی جانب سے جواب جمع کرانے کیلئے مزید دو ہفتے کا وقت مانگ لیا گیا اور بتایا گیا کہ ایف آئی کیس میں مصروف تھے اس لیے جواب جمع نہیں کراسکے ۔

اس پر ریمارکس پیش کرتے ہوئے چیف الیکشن کمشنر نے سوال کیا کہ یہ صرف ریکارڈ کا معاملہ ہے، اتنا وقت کیوں لگ رہا ہے؟

بعدازاں الیکشن کمیشن نے عمران خان کو جواب جمع کرانے کیلئے ایک ہفتے کا وقت دیدیا۔

کیس کی سماعت 7 ستمبر تک ملتوی کرتے ہوئے چیف الیکشن کمشنر نے کہا کہ آئندہ سماعت سے قبل جواب جمع کرایا جائے۔

خیال رہے کہ اس سے قبل ہونے والی سماعت میں الیکشن کمیشن نے عمران خان کو جواب جمع کرانے کیلئے ایک ہفتے کا وقت دیتے ہوئے کیس کی  سماعت 29 اگست تک ملتوی کردی تھی۔