وفاقی وزیر داخلہ رانا ثنااللہ  کا کہنا ہے کہ اسلامی ٹچ دینے والے فنکاروں کو اب قانونی ٹچ کی ضرورت ہے۔

مسلم لیگ ن کے رہنما رانا ثنا اللہ نے شیخ رشید کے بیان پر ردعمل دیتے ہوئے کہا کہ عالمی بنارسی ٹھگ غیرملکیوں سے غیرقانونی ڈالر لیتے پکڑے گئے ہیں، اسلامی ٹچ دینے والے فنکاروں کو اب قانونی ٹچ کی ضرورت ہے۔

فارن فنڈنگ کیس

انہوں نے کہا کہ فارن فنڈنگ کے مجرم 8 سال سے ‘قانونی ٹچ’ سے بھاگ رہے ہیں، چوری پکڑے جانے پرعمران اینڈ فارن ایجنٹس کمپنی فنکاری کرنے لگتے ہیں۔

انہوں نے کہا کہ عمران نیازی نے 8 سال پوری کوشش کی کہ فارن فنڈنگ کیس کا فیصلہ نہ آئے، اللہ تعالیٰ نے اکبر ایس بار کو سچا ثابت کر دیا، جعلی صادق اور امین کی اصلیت قوم کے سامنے آگئی۔

وزیر داخلہ کا مزید کہنا تھا کہ فارن فنڈنگ کیس سے پتہ چلا کہ عمران نیازی کا کردار کیسا ہے، شہدا کے خلاف نفرت انگیز مہم چلانے والے قابل مذمت ہیں۔

حکومت کی آئینی ترامیم ملک کیلئے نہیں اپنی ذات اور مفاد کیلئے ہے، شیخ رشید

پاکستان تحریک انصاف (پی ٹی آئی) کے رہنما شیخ رشید کا کہنا ہے کہ حکومت کی آئینی ترامیم ملک کیلئے نہیں اپنی ذات اور مفاد کیلئے ہے۔

سماجی رابطے کی ویب سائٹ ٹوئٹر پر اپنے جاری کردہ بیان میں شیخ رشید نے کہا کہ سیاستدان اپنے گندے کپڑے میڈیا میں دھورہے ہیں۔

سابق وفاقی وزیر نے کہا کہ سیلاب کی فوٹو کھینچوانے پر زور اور اسٹیٹ بینک کا گورنر مقرر کرنے کا وقت نہیں۔

آسمانی طاقت اور عوام عمران خان کے ساتھ ہے

شیخ رشید نے کہا کہ زمینی طاقتیں 15 حکمران پارٹیوں کے ساتھ ہیں، آسمانی طاقت اور عوام عمران خان کے ساتھ ہے۔