خورشید شاہ نے کہا ہے کہ حکومت اپنی مدت پوری کرے گی۔

تفصیلات کے مطابق وفاقی وزیر برائے آبی وسائل سید خورشید شاہ نے میڈیا سے گفتگو کرتے ہوئے کہا کہ عمران خان کا چیف الیکشن کمیشنر کے حوالے سے عدم اعتماد لانے کااعلان آئی واش ہے۔

انہوں نے کہا کہ پی ٹی آئی اب بھی عوام کو بے وقوف بنانے سے باز نہیں آرہی، قوم یہ سوال پوچھ رہی ہے کہ چیف الیکشن کمیشنر لگایا کس نے تھا۔

وفاقی وزیر کا کہنا تھا کہ دنیا جانتی ہے کہ چیف الیکشن کمیشنر عمران خان نے لگایا تھا اس وقت افہام و تفہیم کے لیے اسوقت کی اپوزیشن نے اس کی حمایت کی تھی۔

سید خورشید شاہ نے کہا کہ قراردادوں سے کچھ نہیں ہوگا،اگر آئین کسی کو پسند نہیں ہے تو کیا قرارداد سے معاملہ حل ہو سکتا ہے؟

انہوں نے یہ بھی کہا کہ عارف نقوی کا معاملہ نیا نہیں لیکن یہ برطانیہ سے ہوکر اب امریکہ پہنچا ہے، ابھی عارف نقوی کا معاملہ چل رہا ہے جو بھی فیصلہ آتا ہے اس پر قوم کو یقین کرنا چاہیے۔

وفاقی وزیر برائے آبی وسائل سید خورشید شاہ نے مزید کہا کہ حکومت اپنی مدت پوری کرے گی ، عمران خان نے کہا تھا کہ مقررہ مدت سے ایک گھنٹہ پہلے بھی الیکشن نہیں ہو سکتے ہم اسی حکم کی تعمیل کریں گے۔