پی ٹی آئی ممنوعہ فنڈنگ کیس کے فیصلے پر مشاورت کیلئے وفاقی کابینہ کا  اجلاس آج طلب کرلیا گیا ہے۔

تفصیلات کے مطابق وزیراعظم شہبازشریف کی زیرصدارت وفاقی کابینہ کا  اجلاس آج 3 بجے ہوگا جس کا 8 نکاتی ایجنڈا جاری کردیا گیا ہے۔

ایجنڈے کے مطابق کابینہ اجلاس میں نیشنل یونیورسٹی کے قیام کی منظوری سمیت پاکستان ری انشورنس کمپنی لیمیٹڈ کے سی ای او کی منظوری دی جائے گی۔

اسکے علاوہ پاکستان اور ڈنمارک کے درمیان فریم ورک معاہدہ کی منظوری کابینہ ایجنڈا میں شامل ہے جبکہ سیلاب کی تباہ کاریوں کے بعد بحالی کے لئے عالمی معاونت کی سمری بھی اجلاس میں پیش ہوگی۔

یوم آزادی کے موقع پر سزاؤں میں کمی کی سمری پیش کی جائیگی جبکہ ترقیاتی اسکیموں پر کام کے آغاز سے متعلق بریفنگ دی جائے گی۔

علاوہ ازیں ای سی سی اور لیجسلیٹو کیسز پر فیصلوں کی توثیق ایجنڈا میں شامل ہے۔

دوسری جانب میں پی ٹی آئی ممنوعہ فنڈنگ کیس کےفیصلے پر مشاورت ہوگی۔

کابینہ اجلاس میں الیکشن کمیشن فیصلے کے بعد کے قانونی کارروائی کےلیے فیصلے ہوں گے جس کے لئے وزیرقانون اورحکومتی قانونی ٹیم کابینہ کو الیکشن کمیشن فیصلہ پر بریفنگ دے گی۔

اجلاس کے دوران عمران خان سمیت پی ٹی آئی رہنماوں کے نام ای سی ایل میں ڈالنے کی منظوری متوقع ہے جبکہ عمران خان کی نااہلی سےمتعلق سپریم کورٹ سے رجوع کے فیصلے کا بھی امکان ہے۔

خیال رہے کہ الیکشن کمیشن نے پی ٹی آئی کے خلاف فیصلے کے بعد معاملہ وفاقی حکومت کو بھجوایا تھا۔