وزیر ریلوے اور ہوابازی خواجہ سعد رفیق کا کہنا ہے کہ حکومت سیلاب سے متاثرہ علاقوں کی تعمیر نو اور بحالی کے لیے جلد جامع حکمت عملی کا اعلان کرے گی۔

 اسلام آباد میں وزیراعظم کے مشیر برائے امور کشمیر و گلگت بلتستان قمر زمان کائرہ کے ہمراہ نیوز کانفرنس سے خطاب  کرتے ہوئے وزیر ریلوے اور ہوابازی خواجہ سعد رفیق  نے کہا ہے کہ موجودہ سیلاب نے دوہزار دس کا سیلاب بھی توڑ دیا ہے جس سے بہت زیادہ تباہی ہوئی ہے ۔

خواجہ سعد رفیق نے تمام سیاسی قوتوں سے کہا کہ وہ اس آزمائش کی گھڑی میں اپنے ذاتی مفادات کے حصول کے بجائے اتحاد کا مظاہرہ کریں۔

وفاقی وزیر نے کہا کہ پوری عالمی برادری اس بحرانی صورتحال میں پاکستان کی مدد کر رہی ہے لیکن پی ٹی آئی سیاسی جھگڑوں میں مصروف ہے اور اس آفت کے پہلے دن سے ہی سیلاب کی صورتحال سے توجہ ہٹا رہی ہے۔

اقتصادی صورتحال کے بارے میں خواجہ سعد رفیق نے کہا کہ معاشی خود انحصاری ہماری واحد منزل ہے اور آئی ایم ایف فنڈ صرف عارضی ریلیف ہے۔

اس موقع پر خطاب کرتے ہوئے وزیراعظم کے مشیر قمر زمان کائرہ نے کہا کہ مسلح افواج، شہری ادارے، فلاحی ادارے اور تمام متعلقہ حکام سیلاب سے متاثرہ افراد کی ریلیف اور ریسکیو پر پوری توجہ مرکوز کیے ہوئے ہیں۔

انہوں نے کہا کہ اس نازک موڑ پر سیاسی پوائنٹ اسکورنگ انتہائی افسوسناک ہے ۔

انہوں نے مزید کہا کہ ریاست دشمنی اور عدالت کی توہین پر کارروائی ہورہی ہے ۔