مراد سعید نے کہا ہے کہ شہباز گل نے بتایا عمران خان کی زندگی کو شدید خطرہ ہے۔

تفصیلات کے مطابق تحریک انصاف کے رہنما مراد سعید نے اسلام آباد میں ریلی سے خطاب کرتے ہوئے کہا کہ دنیا میں ایسا کون سا قانون ہے جو ملاقات کیلئے روکتا ہے، شہبازگل پر جسمانی اور ذہنی تشدد کیا گیا ہے، بتایا جائے شہباز گل پر کس قانون کے تحت تشدد کیا گیا؟

مراد سعید نے کہا کہ شہباز گل کے بیان کو بہانہ بنا کر میڈیا پر قدغن لگائی گئی، میں نے شہباز گل سے ملاقات کی ، ان پر ذہنی اور جسمانی تشدد کیا گیا جبکہ شہباز گل کو گرفتار نہیں بلکہ اغوا کیا گیا۔

ان کا کہنا تھا کہ شہبازگل نے مجھے بتایا کہ پوری رات مجھے سانس لینے میں دشواری رہی، شہبازگل نے بتایا کہ میں علاج کیلئے چیختا رہا لیکن کوئی نہیں آیا اور شہباز گل نے یہ بھی بتایا عمران خان کی زندگی کو شدید خطرہ ہے۔

تحریک انصاف کے رہنما نے کہا کہ شہباز گل کو فوری میڈیکل سپورٹ فراہم کی جائے جبکہ تشدد پر میڈیکل بورڈ تشکیل دیا جائے۔

 مراد سعید نے یہ بھی کہا کہ سمیع ابراہیم اور دیگر صحافیوں پر تشدد اورمقدمات درج کیے گئے، عمران خان نے امریکا کو اڈے دینے سے انکار کیا، عمران خان نے کہا عوام کیلئے فیصلے کرنے ہیں آپکی خوشی کیلئے نہیں۔

ان کا کہنا تھا کہ رجیم چینج کو ہم سب مسترد کرچکے ہیں جبکہ امریکی غلامی اور امپورٹڈ حکومت کو ہم نا منظور کرچکے ، قوم نے عمران خان کے ساتھ مل کر امپورٹڈ حکومت کو شکست دیدی۔

مراد سعید کا یہ بھی کہنا تھا کہ جنگ آخری مرحلے میں ہے، کچھ بھی کرلیں پاکستانی آپ کی دھمکیوں سے نہیں جھکیں گے اور اگر عمران خان کو ہٹانے کی کوشش کی تو پردہ چاک ہوجائے گا۔

تحریک انصاف کے رہنما مراد سعید کا مزید کہنا تھا کہ ان سے پوچھا گیا عمران خان کھانے میں کیا کھاتے ہیں، کان کھول کر سن لو اگر عمران خان کو کچھ کہنے کی کوشش کی تو اینٹ سے اینٹ بجا دیں گے۔