آرمی چیف جنرل قمر جاوید باجوہ کا کہنا ہے کہ دور حاضر کے چیلنجز سے نمٹنے کے لیے نوجوان جدید ٹیکنالوجی سے فائدہ اٹھائیں۔

تفصیلات کے مطابق آرمی چیف جنرل قمر جاوید باجوہ  نے برطانیہ کی رائل ملٹری اکیڈمی سینڈ ہرسٹ میں پاسنگ آؤٹ پریڈ کا معائنہ کیا۔

آرمی چیف جنرل قمر جاوید باجوہ نے پاسنگ آؤٹ پریڈ  کی تقریب سے خطاب کرتے ہوئے سب سے پہلے تمام حاضرین اور ناظرین کو سلام پیش کیا۔

جنرل قمر جاوید باجوہ  کا کہنا تھا کہ پاسنگ آؤٹ کی تقریب میں بطور مہمان خصوصی شرکت باعث فخر ہے۔

انہوں نے کہا کہ  آج کی پاسنگ آؤٹ پریڈ میں پاکستان کے 2  اور دیگر ممالک کے 41 کیڈٹس بھی شامل ہیں۔ پاسنگ آؤٹ پریڈ میں شامل نوجوانوں پر اتنا ہی فخر ہے، جتنا 2 پاکستانی کیڈٹس پر ہے۔

آرمی چیف نے کہا کہ پاس ہونے والے کیڈٹس کو مبارکباد پیش کرتے ہیں۔ امید ہے پاس آؤٹ ہونے والے کیڈٹس دفاعی صلاحیتوں کا لوہا منوائیں گے۔

جنرل قمر جاوید باجوہ نے مزید کہا کہ  دور حاضر کے چیلنجز سے نمٹنے  کے لیے نوجوان جدید ٹیکنالوجی سے فائدہ اٹھائیں۔

انہوں نے کہا کہ  پاکستان اور برطانیہ کے تعلقات دوستی اور باہمی احترام پر مبنی ہیں۔  پاکستان اور برطانیہ میں بہترین دفاعی تعلقات بھی پائے جاتے ہیں۔ امید ہے پاکستان اور برطانیہ کے روابط مزید بلندیوں پر جائیں گے۔

پاک فوج کے سالار جنرل قمر جاوید باجوہ کا اعزاز

جنرل قمر جاوید باجوہ پاک فوج کے پہلے سپہ سالار ہیں جنہیں بطور مہمان خصوصی پریڈ میں شرکت کی دعوت دی گئی ۔

جنرل قمر جاوید باجوہ برٹش ملٹری اکیڈمی میں ملکہ برطانیہ کی نمائندگی کرنے والے پہلے پاکستانی بن گئے۔