ترجمان دفتر خارجہ  عاصم افتخار احمد نے کہا ہے کہ پاکستان جنوب مشرقی ایشیائی ممالک کی تنظیم (آسیان) کے رکن ممالک کو 55 ویں یوم آسیان پر تہنیت پیش کرتا ہے۔

تفصیلات کے مطابق ترجمان دفتر خارجہ  عاصم افتخار احمد نے اہنے ایک بیان میں کہا کہ آسیان تعاون، دوستی اور عدم مداخلت کے اصولوں پر قائم ایک متحرک، مربوط اور فعال اقتصادی تنظیم ہے۔

“پاکستان کا آسیان کے ساتھ دیرینہ تعاون ہے”

ان کا کہنا تھا کہ پاکستان کا آسیان کے ساتھ دیرینہ تعاون ہے جوعلاقائی امن اور ترقی کے مشترکہ مفادات کو آگے بڑھاتا ہے، پاکستان 1993 سے آسیان کا شبعہ جاتی مکالمے کا شراکت دار اور 2004 سے آسیان ریجنل فورم (اے آر ایف) کا رکن ہے۔

“پاکستان نے 2004 میں جنوب مشرقی ایشیائی ممالک کے دوستی اور تعاون کے معاہدے میں شمولیت اختیار کی”

انہوں نے کہا کہ پاکستان نے 2004 میں جنوب مشرقی ایشیائی ممالک کے دوستی اور تعاون کے معاہدے میں شمولیت اختیار کی، پاکستان آسیان کی پیش رفت اور علاقائی تعاون کو آگے بڑھانے میں اہم پیش رفت کو سراہتا ہے۔

ترجمان دفتر خارجہ نے کہا کہ پاکستان اپنے ”ویژن ایسٹ ایشیا“ پالیسی کے مطابق پاکستان آسیان کے ساتھ اپنے کثیر جہتی تعلقات کو مزید مضبوط بنانے کو ترجیح دیتا ہے، پاکستان ”ویژن ایسٹ ایشیا“ پالیسی کا مقصد رکن ممالک کے عوام کے درمیان روابط کو فروغ دینا ہے۔

“کمبوڈیا میں منعقدہ 29ویں آسیان ریجنل فورم کا وزارتی اجلاس حال ہی میں اختتام پزیر ہوا”

ان کا کہنا تھا کہ کمبوڈیا میں منعقدہ 29ویں آسیان ریجنل فورم کا وزارتی اجلاس حال ہی میں اختتام پزیر ہوا ہے، وزیر خارجہ بلاول بھٹو کی اے آر ایف کے وزارتی اجلاس میں شرکت آسیان کے ساتھ اپنی شراکت داری کو آگے بڑھانے کے لیے پاکستان کے عزم کا مظہر ہے۔