حکومت کی جانب سے تمام درآمدات سے پابندی ہٹانے کا اعلان کردیا گیا ہے۔

تفصیلات کے مطابق وزیر خزانہ مفتاح اسماعیل نے پریس کانفرنس کرتے ہوئے کہا ہے کہ تمام درآمدات پر سے پابندی ہٹا رہے ہیں، پابندیاں ہٹا کر ٹیکس ڈیوٹیز لگا دیں گے۔

وفاقی وزیر نے بتایا کہ آئی ایم ایف کے مطالبے پر پابندی ہٹا رہے ہیں کیونکہ آئی ایم ایف چاہتا ہے کہ بورڈ میٹنگ سے قبل امپورٹ بین کو ہٹا دیں اس لئے اب ہم 27 ارب روپے کے ٹیکسز کے لیے آرڈیننس لگائیں گے۔

انہوں نے کہا کہ آئی ایم ایف نے ایگزیکٹو بورڈ کے اجلاس کی تاریخ کا بتا دیا ہے جو کہ 29 اگست کو منعقد ہوگا اسکے علاوہ 4 ارب ڈالر کی بیرونی فنڈنگ کا بھی انتظام ہو گیا ہے۔

انہوں نے بتایا ہے کہ آرڈیننس کےذریعےتاجروں کیلئےٹیکس لائیں گے، کوشش ہوگی جتنی ڈیوٹیز ہیں اس پر 3 گنا ریگولیٹری ڈیوٹی لگادیں گے اور امپورٹڈ اشیاء پر ڈیوٹی لگادیں گے تاکہ زیادہ امپورٹ نہ ہوسکے۔

مفتاح اسماعیل کا کہنا تھا کہ تمباکو پر ٹیکس 10 روپے سے بڑھا کر 380 روپے کررہے ہیں اور لگژری گاڑیوں، الیکٹرانکس پر 400 سے 600 فیصد ٹیکس کردینگے، لگژری آئٹم پر ٹیکس کی شرح بڑھانے سے 14 ارب روپے تک کا ٹیکس ملے گا۔

ان کا کہنا تھا کہ یکم اکتوبر سے تاجروں پر 7.5 فیصد اِنکم ٹیکس اور 5 فیصد سیلز ٹیکس ہو گا جبکہ یکم اکتوبر کے بعد پچاس یونٹ سے زائد استعمال کرنے والے تاجروں پر ٹیکس بڑھے گا۔

انہوں نے کہا کہ اگست میں برآمدات میں 8 فیصد اضافہ ہوا ہے اور درآمدات میں 19 فیصد تک کمی آئی ہے جبکہ تجارتی خسارے میں 30 فیصد کمی ہوئی ہے اسکے علاوہ بینکنگ سسٹم میں 650 ملین ڈالر زیادہ آئے ہیں۔

ان کا کہنا تھا کہ صنعت کاروں کو مشینری کی درآمد کی جلد اجازت دی جائے گی جبکہ چھوٹی مشینری کی درآمد پر ابھی بھی پابندی نہیں ہے لیکن جو صنعت کار مشینری درآمد کر کے مارکیٹ میں فروخت کرتے ہیں ان کیلئے ابھی اجازت نہیں دی جائے گی۔

اس موقع پر وفاقی وزیر نے بتایا کہ ہماری پالیسیز کارآمد ثابت ہورہی ہیں جس کی وجہ سے معیشت بہتر سمت میں ہے۔

ان کا کہنا تھا کہ سعودی عرب، قطر، متحدہ عرب امارات اور چین نے مشکل وقت میں ہماری مدد کی ہے ۔

انہوں نے بتایا کہ سعودی کمپنی پاکستان میں ٹیلی کام سیکٹر میں سرمایہ کاری کرے گی جس کے زیر اثر پاکستان میں 70 سے 80 ٹیلی کام ٹاورز نصب کیئے جائیں گے،اس کے علاوہ بھی سعودی کمپنی بڑی سرمایہ کاری کا ارادہ رکھتی ہے۔

انہوں نے کہا کہ ہم روس سے 1 لاکھ 80 ہزار میٹرک ٹن گندم خریدیں گے جو کہ 390 ڈالر فی میٹرک ٹن کے حساب سے گندم خریدی جائے گی۔