سندھ نے گندم کی امدادی قیمت 3 ہزار مقرر کرنے پر پنجاب حکومت کے فیصلے کو کسان دشمن قرار دے دیا ہے۔

اس حوالے سے وزیر ماحولیات سندھ اسماعیل راہو نے اپنے جاری کردہ بیان میں کہا کہ پنجاب حکومت کو گندم کی فی من امدادی قیمت 3 ہزار مقرر کرنے کے فیصلے کو فورن واپس لینا چاہیے۔

‘پنجاب حکومت ہوش کے ناخن لے’

انہوں نے کہا کہ پیپلز پارٹی نے ہمیشہ کسانوں کو گنے اور گندم کی قیمت دیگر حکومتوں سے اچھی دی ہے، پنجاب حکومت ہوش کے ناخن لے ڈی اے پی، یوریا کھاد اور ڈیزل کی قیمتوں میں اضافے کو دیکھا جائے تو کسانوں کے لئے 3 ہزار روپے قیمت بہت کم ہے۔

اسماعیل راہو نے کہا کہ پی ٹی آئی محنت کش دشمن جماعت ہے، عمران خان کا یہ فیصلہ کاشتکار اور زراعت کو تباہ کر دے گا، سب سے زیادہ گندم پیدا کرنے والے صوبے کے کاشتکار اور کسان کا استحصال ہے۔

صوبائی وزیر نے کہا کہ پنجاب کے اس فیصلے سے پاکستان خوراک کی کمی کا شکار ہو سکتا ہے، پنجاب کے کسان گندم کی اچھی قیمت نہ ملنے پر مایوس ہیں۔

‘ملک میں آئندہ سال گندم کم اترنے کا خدشہ ہے’

وزیر ماحولیات سندھ کا کہنا ہے کہ سندھ نے پنجاب کو گندم کی امدادی قیمت 4 ہزار روپے مقرر کرنے کی تجویز دی تھی، پی ٹی آئی کا ویژن رہا ہے کہ کسانوں سے سستی گندم خرید کر مافیاز کو فائدہ پہنچاؤ۔

اسماعیل راہو نے مزید کہا کہ پرویز الہیٰ نے جان بوجھ کر گندم کی امدادی قیمت 3 ہزار روپے مقرر کی تاکہ ملک میں گندم کا بحران پیدا ہو، پہلے ہی ملک میں سیلابی صورتحال کی وجہ سے آئندہ سال گندم کم اترنے کا خدشہ ہے، کیوں کہ ابھی تک زمینوں میں 3 سے5 فٹ تک بارش کا پانی کھڑا ہے۔

پنجاب حکومت کا اہم اقدام

ملک کو ممکنہ قحط کے خطرے سے بچانے اور زیادہ سے زیادہ گندم اگانے کے لئے پنجاب حکومت نے اہم فیصلہ کیا ہے۔

ملک کو ممکنہ قحط کے خطرے سے بچانے اور زیادہ سے زیادہ گندم اگانے کے لئے پنجاب حکومت کا اہم اقدام! گندم کی امدادی قیمت 2200 روپے سے بڑھا کر 3000 روپے مقرر۔ انشاءاللہ، پنجاب کے کسان اب اور زیادہ گندم اگائیں گے، دیس کو اناج میں خود کفیل بنائیں گے ۔#WheatSupportPrice #Punjab

— Moonis Elahi (@MoonisElahi6) September 14, 2022

مسلم لیگ ق کے رہنما مونس الہیٰ نے اپنے ٹوئٹر پر بتایا کہ گندم کی امدادی قیمت 2200 روپے سے بڑھا کر 3000 روپے مقرر کردی گئی ہے۔

مونس الہیٰ نے مزید کہا کہ انشاءاللہ، پنجاب کے کسان اب اور زیادہ گندم اگائیں گے، دیس کو اناج میں خود کفیل بنائیں گے۔