ملک بھر میں ڈینگی کے مریضوں کی تعداد میں خطرناک حد تک اضافہ دیکھنے کو مل رہا ہے۔

تفصیلات کے مطابق ملک بھر میں ڈینگی کی صورتحال دن بہ دن خراب ہوتی جارہی ہے جس کے پیش نظر یومیہ ہزاروں کیسز رپورٹ ہورہے ہیں۔

محکمہ صحت کا کہنا ہے کہ امسال ڈینگی کے کیسز بلوچستان کی تاریخ کی بلند ترین سطح پر پہنچ گئے ہیں، صوبے میں ڈینگی کے کیسز بڑھ کر 3198 تک پہنچ گئے ہیں۔

 محکمہ صحت نے بتایا کہ زیادہ تر کیسز کیچ، گوادراور لسبیلہ سے رپورٹ ہوئے، کیچ سے 72، لسبیلہ سے 29 اور گوادر سے 26 کیس رپورٹ ہوئے۔

محکمہ صحت کا کہنا ہے کہ بلوچستان سے ڈینگی کے گزشتہ دس سال کے مقابلے میں سب سے زیادہ کیس  2022 میں رپورٹ ہورہے ہیں۔

دوسری جانب صوبہ سندھ میں بھی ڈینگی کے وار جاری ہیں، سندھ بھر میں گزشتہ چوبیس گھنٹوں کے دوران ڈینگی کے مزید 309 کیسز رپورٹ ہیں جن میں سے 218 کیسز کراچی سے سامنے آئے ہیں۔

 محکمہ صحت سندھ کی جاری کردہ رپورٹ کے مطابق کراچی کے دو اضلاع مہلک وائرس سے سب سے زیادہ متاثر ہیں، ضلع شرقی میں 76، وسطی میں 72 افراد میں ڈینگی وائرس کی تصدیق کی ہے۔

محکمہ صحت سندھ کا کہنا ہے کہ ضلع کورنگی میں 20، جنوبی میں 23، ملیر میں 12 ، کیماڑی میں 8 کیسز رپورٹ ہوئے ہیں۔

محکمہ صحت سندھ نے مزید بتایا کہ رواں سال تاحال صوبے بھر میں سامنے آنے والے 7197 کیسز میں سے 6268 کراچی میں رپورٹ ہوئے ہیں جس کے بعد رواں سال تاحال موذی وائرس سے ہلاکتوں کی تعداد 31 ہوگئی ہے۔

 خیبرپختونخوا کی بات کی جائے تو وہاں بھی ڈینگی کے وار جاری ہیں، گزشتہ 24 گھنٹوں میں ڈینگی کے مزید 284نئےکیسزرپورٹ ہیں۔

محکمہ صحت کا کہنا ہے کہ صوبے میں ڈینگی سے متاثرہ مریضوں کی مجموعی تعداد 6ہزار 153 ہے جبکہ ایکٹیو کیسز کی تعداد1ہزار 1716 ہوگئی ہے۔

محکمہ صحت نے مزید بتایا کہ صوبے بھر سے اب تک ڈینگی کے 6 مریض جاں بحق ہوچکے ہیں۔

ڈینگی روکنے کے لیے کمشنر کراچی کا نیا حکم نامہ جاری

 کراچی میں ڈینگی روکنے کے لیے کمشنر کراچی کی جانب سے نیا حکم نامہ جاری کردیا گیا ہے۔

کراچی میں تعلیمی اداروں میں ایک ماہ تک پی ٹی اور اسمبلی پر پابندی کا فیصلہ عائد کیا گیا ہے۔

کمشنر کراچی کا کہنا ہے کہ  اسٹوڈنٹس کو مکمل آستین اسکول ڈریسز پہننے کی ہدایت کی جائے اور تعلیمی اداروں میں صفائی کا خیال رکھا جائے۔

کمشنر کراچی نے کہا کہ ڈینگی پھیلاؤ روکنے کے لیے پہلے سے کھڑے پانی کی نکاسی اور اسپرے کیا جائے، ڈینگی مچھر ہونے پر اسکول انتظامیہ فوری متعلقہ ضلعی انتظامیہ کو آگاہ کرنے کی پابند ہوگی۔